Shil Khasaaro gaystay oo ka dhacay Muqdishu
-
- Posted On 06-03-2017, 12:36PM
MUQDISHU, Somalia- Shil gaari oo gaystay khasaaro dhimasho iyo dhaawac isugu jira ayaa maanta oo Isniin ah ka dhacay gudaha magaalada Muqdishu, ee caasumadda dalka Somalia.
Shilka ayaa ka dhacay Wadada 21-ka October ee degmada Waaberi, kadib markii ay isku dhaceen Gaari nooca xamuulka qaada ah iyo NOAH, ay la socdeen dad shacab ah, sida Goob jooje uu u sheegay Garowe Online.
Goob joogaha ayaa xaqiijiyay Labo ruux, oo kamid ahaa dadkii saarnaa Gaariga NOAH-da ayaa ku geeriyoodeen isku dhaca baabuurtaas, iyadoo ay saddex kale ay ku dhaawacmeen, kuwaasi oo loola cararay Isbitaal goobta ka dhawaa.
Ciidamo katirsan kuwa waddooyinka dowladda Somalia ayaa xiray wadadaas shilka kadib, waxaana goobta ay ka jiideen labada gaari ee isku dhacday.
Shilalka noocan ah ayaa kusoo badanaya mudooyinkii dambe wadooyinka magaalada Muqdishu, waxaana loo sababeeyay gaadiidka oo aad u batay iyo waddooyinka oo qaybtood xiran.
GAROWEONLINE
