Somalia: Weerar ka dhacay gobolka Gedo
-
- Posted On 21-01-2017, 11:59AM
CEEL-WAAQ, Somalia- Kolonyo gaadiid ay wateen ciidamada Kenya ee qeybta ah AMISOM ayaa lagu weeraray meel ku dhaw degmada Ceel-Waaq ee gobolka Gedo.
Sarkaal katirsan ciidamada dowladda Somalia oo ku sugan goobtaas ayaa xaqiijiyay in labo Askar oo kamid ahaa ciidanka Kenya ay ku dhinteen weerarka gaadmo ah.
Dagaalyahanno hubaysan oo la sheegay inay katirsanyihiin Al Shabaab ayaa jidka u galay gaadiid ciidanka Kenya xilli ay marayeen tuulada Buzaar,ee duleedka Ceel-Waaq.
Dagaal culus ayaa labada dhinac ku dhexmaray Buzaar, waxaana dadka deegaan ay tilmaameen inay maqlayeen qaraxyo iyo rasaas xooggan oo ka dhashay khasaarooyin kala duwan.
Wararka ayaa xusaya in dhowr xubnood Al shabaab looga dilay isku dhacaas, iyadoo mid kamid ah gaadiidka militariga Kenya lagu gubay miino wadada dhinaceeda lagu aasay.
Militariga Kenya kama aysan hadlin dagaalka, oo kamid ah weeraro joogto ah oo Kooxda Al shabaab ka fulinayso gudaha dalkaasi tan iyo markiii ciidamada Kenya soo galeen Somalia 2011.
Al Shabaab ayaa ka dambaysay dhowr weerar oo ay ku qaadeen ciidamada kala duwan ee AMISOM intii u dhaxaysay 2015 iyo 2016, kuwaasi oo ay kamid ahaayeen dagaalladii ay ku qaadeen Leego, Janaale iyo Ceel cadde kuwaasoo ay ku dhinteen Askar badan.
GAROWEONLINE
