Soomaaliya oo raadinaysa Kursiga Gollaha Amaanka

MUQDISHO - Soomaaliya ayaa ku dhawaaqday inay u tartamayso kursiga aan joogtada ahayn ee Golaha Ammaanka ee Qaramada Midoobay, iyadoo tallaabadan ay ku soo beegantay laba sano ka dib markii Kenya ay dagaal kula gashay Jabuuti, iyadoo loollankaas oo ahaa mid isha lagu wada hayay.

Sida laga soo xigtay warbaahinta dowladda, Soomaaliya waxay aad u dooneysaa inay u tartanto doorashada kursiga oo lagu fadhinayo 2025/26, waxayna tallaabadaas ku tilmaantay mid “muhiim ah” oo dalka horey usii wadaysa horumarkiisa. Dalkan Geeska Afrika ku yaalla ayaa muddo dheer la daalaa dhacayay falal amni darro, balse horumarro badan ayaa laga sameeyay dhinaca dowlad-dhiska mudooyinkii dambe.

Isagoo dhawaanahan booqasho ku marayay dalalka Jabuuti iyo Kenya, Xoghayaha Difaaca Mareykanka, Lloyd Austin III, ayaa sheegay in Soomaaliya ay ku taagan tahay "wadadii saxda ahayd" ee ay ku guuleysan lahayd dagaalka Al-Shabaab. Maraykanku waxa uu door muhiim ah ka yahay la dagaallanka argagixisada Soomaaliya, qalabaynta iyo tababarida ciidamada gaarka ah ee Danab ee hawshaas ku guda jira.

Hadda, Soomaaliya waxa ay hogaaminaysaa howlgallada wadajirka ah ee ka dhanka ah Al-Shabaab, oo ah koox u dagaalanta sidii ay dowladda u dumin lahayd. Waxa kale oo taageera Hawlgalka Ku-meel-gaarka ah ee Midowga Afrika ee Soomaaliya [ATMIS], oo waqtigiisu ku eg yahay 2024.

Afrika waxay u ol’olaynaysaa sidii ay Gollaha Amaanka uga heli lahayd kursi joogto ah iyo kuraas badan oo aan joogto ahayn. Hadda qaaraddu waxay leedahay saddex kursi oo aan joogto ahayn oo ay ku fadhiyaan ​​Mozambique, Algeria iyo Sierra Leone.

Shanta waddan ee joogtada ah Gollaha Amaanka - US, Russia, China, UK, iyo France waxay "xaq u leeyihiin" inay diidaan qaraar kasta iyada oo aan loo eegin inta kale ee taageersan go'aanka. Ururka ayaa go’aamo muhiim ah ka soo saara arrimaha amniga, haddii ay Soomaaliya ku guuleysato waxay noqon doontaa mid ka mid ah guulaha taariikhiga ah.

Toddobaadkii hore, Soomaaliya waxay ka tanaasushay musharaxnimadii Gudoomiyaha Midowga Baarlamaannada Adduunka oo uga hartay Tanzania, oo dowladda Federaalka ka caawinaysa ku biirista Bulshada Bariga Afrika [EAC].

Madaxweyne Xasan Sheekh Maxamuud ayaa ballan qaaday in uu dalka ka xasilin doono dhinacyada amniga iyo dhaqaalaha markii uu xilka kala wareegay Maxamed Cabdullaahi Farmaajo 2022. Muddo bilooyin ah Xasan Sheekh wuxuu dagaal lagula jiraa Al-Shabaab.

GAROWE ONLINE