MUQDISHO, Soomaaliya - Dowladda Soomaaliya ayaa markii ugu horeysay faahfaahin ka bixisay sababihii ay dalka uga ceyrisay Ku xigeenka Midowga Afrika ee Soomaaliya Simon Mulongo.

Wasiirka arrimaha dibadda, Maxamed Cabdirisaaq Maxamuud, ayaa sheegay in aysan ku degdegin in ay dalka ka ceiriyaan Mr Malungo islamarkana ay arrintan muddo dheer soo socotay.

Maxamuud ayaa intaa kudaray in ay adagtahay in la qaato go'aanka ah in qof dublamaasi ah dal laga ceyriyo, balse go'aankan uu ahaa mid laga fursan waayay.

"Waxa la yiraahdo persona non grata waa arrin aad u adag oo aanan lagu degdegin oo aanan la sameynin oo dowladaha inta badan ay aad uga gaabsadaan, indhaha ka qabsadaan ay maraan jidad kale oo qof sidaas oo kale ah dalka looga badalo ama looga kaxeeyo marka arrintaas anaga waan ka fajigneyn waana ognahay in halkaas wax la gaarsiiyo ma ahayn laakiin haddii laga fursan waayo waxaa muqadas ah ilaalinta qarannimada Soomaaliya," ayuu yiri.

Diblumaasiga ugu sareeya Soomaaliya ayaa hoosta ka xariiqay n Simon Malungo uu ku tuntay shuruucda dalka u taalla taasina ay sababatay in ay dalka ka ceyriyaan.

"Ninkaan isaga ah aniga oo aanan rabin inaan hoos u galo, si guud waxaan kuugu sheegayaa in raad badan oo uu leeyahay lagu arkay waxyaabo dambiyo ah, wadanka la joogo sharcigiisa waa in la dhowraa, sharafkiisa waa in la dhowraa," ayuu intaa ku daray wasiirka.

Dhanka kale, wasiir Maxamuud ayaa ku eedeeyay Simon Malungo in uu isku dayay in uu hor-istaago baaritaankii dadkii ay ciidamada Amisom ku dileen deegaanka Golweyn ee gobololka Shabeelada hoose.

Simon oo wareysi siiyay mid ka mid ah warbaahinta maxalliga ee Uganda ayaa fajac ku tilmaamay go'aanka dowladda. Wuxuu sheegay inuusan garanaynin sababta looga ceyriyay dalka, wuxuuna sheegay in warqadda ka soo baxday dowladda aysan ku jirin faahfaahin ku saabsan sababta loo ceyriyay.

GAROWE ONLINE