Swan oo digniin kasoo saarey xaaladda Soomaaliya

MUQDISHO, Soomaaliya – Ergayga gaarka ah ee Xoghayaha guud ee Qaramada Midoobay u qaabilsan arrimaha Soomaaliya, James Swan, ayaa Isniintii wuxuu warbixin ka hor=jeediyey Golaha Ammaanka Jamciyada Quruma Ka Dhaxeysa.

Swan ayaa hadal-jeedintiisa ku qabsoomay qaab fogaan arag ah wuxuu diiradda ku saarey xaaladda guud ee Soomaaliya isaga oo si gaar ah u dul-istaagay is-mari-waaga ka taagan doorashooyinka heer federaal ee loo madlanaa 2020-21.

Diblumaasiga Ameerikaanka ah ayaa golaha la wadaagay warbixin fahfaahsan oo ku saabsan qodobada la isku hayo iyo guuldarooyinka shirarkii u dambeeyay.

"Mowqifka Beesha Caalamka wuu cad yahay; waa in aysan jirin doorasho hal dhinac ah, geed-socod is-bar-bar socda, iyo go’aano hal dhinac ah," ayuu xusay.

Dhacdooyinkii ugu dambeeyay ee Muqdisho ay martigelisay kuwaas oo ka dhashay kala aragti-duwanaanta siyaasadeed ayuu ka digay in ay wiiqaan horumarka ay Soomaaliya ka sameysay dowlad dhiska iyo ammaanka guud.

Wakiilka ayaa ku nuux-nuux-saday ahmiyadda ay leedahay in mar kale ay wadda hadal isugu yimaadaan madaxda Soomaalida si loosii wado dedaalada lagu dhaqan-gelinayo heshiiska 17-kii September oo saddex qodob kasoo noqdeen.

Qodobadaas oo xudun u ah khilaafka haatan taagan ayaa kala ah; arrinta gobolka Gedo oo ah tan ugu culus la iskuna hayo in lasoo saaro ciidanka dowladda, qaabka loo xulayo wakiilada Somaliland iyo guddiyadda maamulaya coddeynta heer federaal.

GAROWE ONLINE