Taliyaha Guutada 3aad oo Qarax ka badbaaday
-
- Posted On 01-10-2017, 11:56AM
MUQDISHO, Soomaaliya - Taliyaha Guutada Saddexaad ee Ciidamada Xoogga dalka Soomaaliya, ayaa saaka ka badbaaday Isku-day dilka kadib markii Qarax lagula eegtay Kolonyo uu la socday oo maraysay duleedka magaalada Muqdisho.
Qaraxa oo ahaa miino wadada qarkeeda lagu aasay ayaa Taliyahan oo lagu magacaabo Aadan Labo Afle lagula eegtay inta u dhaxaysa deegaanka Tareedisho iyo Garasbaaley, oo kaabiga ku haya Muqdisho.
Saraakiisha maamulka deegaanka Garasbaaley ayaa xaqiijiyay in dhowr Askari oo saarnaa Gaari Cabdi-Bile ah, oo galbinayay Taliyaha ay ku dhaawacmeen, kadibna loo soo qaadey Isbitaal ku yaalla magaalada Muqdisho.
Al Shabaab ayaa sheegatay Mas'uliyadda weerarka qaraxa, ee lagu qaarijin lahaa Taliyaha Guutada Saddexaad ee Ciidamada Xoogga dalka, Aadan Labo Afle, sida lagu sheegay warar lagu baahiyay Baraha Internet-ka ee taageera.
GAROWEONLINE
