Soomaliya: Waare iyo Xaaf oo ka dagay Kismaayo
-
- Posted On 08-10-2017, 11:50AM
KISMAYO, Soomaaliya- Madaxda maamullada HirShabeelle Maxamed Cabdi Waare iyo Galmudug Axmed Ducaale Geelle Xaaf, ayaa hadda ka dagay garoonka diyaaradaha magaalada Kismaayo ee xarunta Jubbaland, halkaasoo la filayo inuu ka furmo shir looga hadlayo xaaladda siyaasadeed ee waddanka.
Madaxweynaha Jubbaland Axmed Maxamed Islaam (Madoobe) iyo dhigiisa Koonfur Galbeed Shariif Xasan Sheekh Aadan ayaa kusoo dhaweeyay garoonka oo aad loo soo camiray iyadoo ay ku suganyihiin Xildhibaano katirsan Baarlamaanka Dowladda Federaalka Soomaaliya.
Madaxdan ayaa loo gudbiyay qaybta Nasashada xilli la filayo inuu goordhow soo gaaro Kismayo Madaxweynaha maamul Puntland Cabdiwali Maxamed Cali Gaas.
Kulanka aya la filayaa inuu maanta ka furmo magaalada Kismaayo iyadoo looga arrinsanayo sidii xal looga gaari lahaa khilaafaadka siyaasadeed ee waddanka ka jira.
Gogoshan oo ku baaqay Axmed Madoobe waxaa cago jiid ka muujiyay dowladda Federaalka Soomaaliya iyadoo ku baaqday in dib loo dhigo.
Goor sii horaysay Madaxda Jubbaland ayaa sheegtay inaysan baajin doonin kulankan, iyadoo intaas ku dartay in maamulladu ka hadli doonaan wada-shaqayntooda iyo maslaxadda dalka.
Waa kulankii ugu horeeyay ee khaas u ah madaxda maamullada Soomaaliya tan iyo markii 08 Febraayo la doortay Madaxweyne Farmaajo, kaasoo muddooyinkii u dambeeyay wajahay cadaadis iyo khilaafyo siyaasadeed gaar ahaan mucaaradad uga imaanaysay maamullada dalka.
GAROWE ONLINE
