Wafdi uu hogaaminayo wasiir Sabriye oo gaarey Dhuusamareeb
-
Wariyaha Muqdisho GAROWE ONLINE
- Posted On 26-03-2019, 12:20PM
DHUSAMAREEB - Wafdi ka socda Xukuumadda Soomaaliya, oo uu hogaaminayo Wasiirka Arrimaha Gudaha, Cabdi Maxamed Sabriye ayaa maanta oo Talaado ah gaarey magaaladda Dhuusamareeb, ee xarunta maamulka Galmudug.
Wasiir Sabriye ayaa wadahadallo kula leh Madaxtooyadda Galmudug Madaxweynaha maamulkaasi, Axmed Ducaalle Geelle Xaaf iyo madaxa Xukuumadda, Maxamed Shaakir.
Wararka ayaa sheegaya in kulanka diiradda lagu saarayo arrimaha doorashadda Galmudug oo khilaaf uu ka taagan yahay qabsoomideeda, kadib markii Madaxweyne Xaaf uu sameystay dhawaan mudo korarsi.
Dowladda Federaalka, gaar ahaan Wasaaradda Arrimaha Gudaha ayaa ka shaqeynaysa sidii ay uga dhaadhicin lahayd Madaxweyne Xaaf iyo Maxamed Shaakir in doorashadda ay qabtaan waqtigeeda, islamarkaana ka tanaasulaan mowqifkooda mudo korarsiga.
Xaaf ayaa doonaya in mudo xileedkiisa looga soo billaabo markii ay midoobeen Galmudug iyo Ahlu Sunna bishii January ee 2018, taasi oo ay kasoo horjeysteen garabka Cadaado iyo Villa Somalia.
GAROWE ONLINE
