Shirkii Baarlamaanada Soomaaliya oo lasoo gabagabeeyay
-
Wariyaha Muqdisho Garowe Online
- Posted On 30-12-2017, 10:22AM
BAYDHABO, Soomaaliya - Waxaa lasoo gaba-gabeeyay Shirkii magaalada Baydhabo uga socda maalmihii lasoo dhaafay gudoonada Golayaasha Sharci-dejinta dowlad goboleedyada iyo dowladda Federaalka Soomaaliya.
Shirkan oo muran badan iyo khilaaf dhaliyay, ayaa waxaa soo qaban-qaabiyay islamarkaana Shir gudoomiyay Afhayeenka Gollaha Shacabka Maxamed Sheekh Cismaan Jawaari.
Waxaa ka qeybgalay Gudoomiyaasha baarlamaanada shanta dowlad goboleed ee ka dhisan dalka, Puntland, Galmudug, Hirshabeelle, Koonfur Galbeed iyo Jubbaland iyo Xildhibaanno dhowr ah.
Gudoomiyaha baarlamaanka Koonfur Galbeed, Cabdulqaadir Shariif Sheekhuna Maye ayaa warbaahinta u aqriyay war murtiyeedkii shirka ka soo baxay.
Qodobada lagu heshiiyay waxaa kamid ah;
In Kulan wadajir ah lala yeesho Hay'adaha Deeq-biyaasha horaanta 2018
In dib u eegis lagu sameeyo mashruuca tayo dhisida Golayaasha
In lagu dheera-geliyo Hay'adaha fulinta heer Federaal iyo Heer dowlad goboleed dhamaystirka Arrimaha ka dhiman Federaaleynta dalka
In la xoojiyo xiriirka Gudiyada Golayaasha sharci dejin ee isku shaqada ah
In la dheera-geliyo adeegsiga "Video Conference" si xiriirka Golayaasha joogto u noqdo
In Golle walba wadatashi isagu noqdo si looga fiirsado adeegsiga kalmadda Sharci-dejinta
GAROWE ONLINE
