Warsame: Xalka waa in Farmaajo madaxtooyada banneeyo

Madaxweynaha muddo xileedkiisa uu dhamaadey ayaa wajahaya cadaadis xoogan.

MUQDISHO, Soomaaliya - Xalka qalalaasaha Soomaaliya wuxuu ku jiraa in Farmaajo baneeyo Madaxtooyadda si loo qabto doorasho, sida uu aaminsan yahay musharax madaxwayne.

Cabdiraxmaan Cabdishakuur Warsame oo qoraal ku daabacay ciwaankiisa gaarka ah ee Facebook-ga ayaa ka dhawaajiyey in Farmaajo inta uu Madaxtooyada ku jiro "uusan joojineyn dhibka".

Sida laga soo xigtey Warsame oo qoraal ku daabacay bartiisa Facebook-ga, xaalada haatan ka taagan Soomaaliya waxay lamid tahay tan waqti xaadirkan ka jirta waddanka Lubnaan.

"Soomaaliya iyo Lubnaan waa labo dal oo xaaladdo badan oo siyaasadeed iskaga eg. Madaxweynihii hore ee Lubnaan Amiin Laxuud ayaa muddo xileedkiisii dhamaaday 24 November 2007, iyada oo aan Madaxweynahihii beddeli lahaa weli la dooran," ayuu yiri.

Wuxuu ku daray: "Laxuud, saqdii dhexe ee habeenkii 24-ka, ayuu ka guuray qasriga Baacabda ee Madaxtooyada Lubnaan. Waxaa xilka si ku-meel-gaar ah ula wareegay Fu’aad Sanyuura oo ahaa Raysalwasaarihii dalka, ilaa 25 May 2008 Misheel Sulaymaan Madaxweyne loo doortay".

"Xalku wuxuu ku jiraa in Farmaajo Madaxtooyada soo banneeyo, si dalka doorasho looga qabto, haddii kale inta uu halkaa ku jiro dalka doorasho aadi maayo, isaguna shiddo iyo dhib dayn maayo," ayuu kusoo xiray.

Warsame ayaa kamid ah siyaasiyiinta mucaaradka ku ahaa taliska Farmaajo afartii sano ee lasoo dhaafay isla markaana kala kulmay tacadiyadda ay kamid tahay weerar iyo beegsi shaqsi ah.

GAROWE ONLINE