Wasiir Islow oo hortagaya Gollaha Shacabka [Akhri]
-
Wariyaha Muqdisho GAROWE ONLINE
- Posted On 22-11-2017, 10:27AM
MUQDISHO, Soomaaliya - Wasiirka amniga Xukuumadda Ra'iisul Wasaare Khayre Maxamed Abukar Islow ayaa maanta hortagaya Gollaha Shacabka ee Baarlamaanka Soomaaliya.
Wasiirka Amniga ayaa horgeynaya Xildhibaanada Hindise sharciyeedyada la dagaalanka Argagaxisada iyo xakaameynta hubka wax dila, kuwaasi oo dhawaay ay soo meel-mariyeen Gollaha Wasiiradda Soomaaliya.
Islow ayaa sharaxaad ka bixin doono labada sharci, ee wasaaradiisu ay soo diyaarisay, waxaana Gollaha shacabka marsiin doonaa akhrinta kowaad, iyadoo kadib lagu wareejin doono gudiga difaaca iyo amniga ee Aqalka hoose ee Baarlamaanka.
Wasiirka ayaa sheegay in labada hindise sharciyeed ay muhiim u yihiin sugida amniga dalka, maadaama dalka aysan ka jirin sharciyo lagu xameynayo hubka iyo midka la dagaalanka argagaxisada.
Tan iyo markii la magacaabay Wasiirka Islow horaantii sanadkan waxaa dalka, gaar ahaan Muqdisho ka dhacay qaraxyo waaweyn oo uu kamid ahaa midkii Isgoyska Zoobe 14-kii bishii October, kaasi oo ay ku dhinteen in ka badan 400 oo qof.
GAROWE ONLINE
