Wasiirka Dastuurka Soomaaliya oo Kalsoonida lagala noqday

MUQDISHO, Soomaaliya - Gudiga Dib u eegida iyo la socodka hergelinta Dastuurka Baarlamaanka Soomaaliya ayaa shaaciyay inuu kalsoonida kala noqday Wasiirka Dastuurka Cabdiraxmaan Xoosh Jibriil.

War qoraal ah oo uu soo saarey Gudiga ayaa lagu sheegay in Kalsoonidii wadasheyn kala noqday Wasiirka kadib markii uu afduubay, caqabadna ku noqday hanaanka dib u eegista Dastuurka Dalka.

Kalsooni kala noqoshada Cabdi Xoosh waxaa lagu wargeliyay Gudoonka Labada Aqal ee Baarlamaanka, Madaxweyne Maxamed Cabdullaahi Farmaajo iyo Ra’iisul Wasaaraha Soomaaliya Xasan Cali Kheyre.

Qoraalka oo ka kooban 6 qodob ayaa lagu xusay in Xoosh uu ka baxay Wadashqeyntii Gudiga, iyo inuu jebiyay qodobada dastuurka ee 133 iyo 134 oo sharaxaya wadada loo marayo dib u eegista Dastuurka iyo doorka Gudiga.

Wasiir Xoosh waxa uu ka baxay heshiiskii wadashaqeynta oo marar badan Gudiga uu ka sameeyay tanaasul si howsha dib u eegista Dastuurka u socoto, isagoo taasina siinin wax xushmad iyo tixgelin ah.

Xoosh Jibriil ayaa sharcidarro ku tilmaamay miisaaniyadii ay Gollaha Shacabka u ansixiyeen gaar ahaan Madaxa miisaniyada ee dib u eegista Dastuurka taas oo uu sheegtay in Wasaaradiisa gooni u leedahay.

Gudiga ayaa tilmaamay in Wasiirka uu ku mashquulsan yahay in Dastuurka laga marin habaabiyo jidka saxda ah, islamarkaana ay Xukuumadda sameysato Dastuur aan loo marin dib u eegis bulshada kawada qeyb-qaadatay.

Ugu dambeyntii, Gudiga ayaa u jeediyay labada aqal ee Baarlamaanka inay tallaabo sharciga waafaqsan laga qaado Wasiirka Dastuurka, oo uu sheegay inuu yahay shaqsi aan ku habooneyn shaqada uu hayo.

Arintan ayaa kusoo beegmaysa xilli dhawaan Wasiirka ayaa uu baraha Bulshada ku aflagaadeeyay Afhayeenka Puntland Focus Group Ciise Maxamud Faarax 'Dhollowaa' kadib markii madasha ay soo saarey qoraal ay ku saxayso qaladaadkiisa dhanka shaqada.

Hoos ka akhri qoraalka Gudiga:

GAROWE ONLINE