Xamse oo hortagay Guddoonka iyo Guddiga Joogtada ah Golaha Shacabka

Ra’iisul Wasaaraha Xukuumadda Soomaaliya ayaa qodobo kala duwan kala hadlay mas'uuliyiinta.

MUQDISHO, Soomaaliya - Ra’iisul Wasaaraha Xukuumadda Jamhuuriyadda Federaalka Soomaaliya, Xamsa Cabdi Barre, ayaa maanta hortagay Guddoonka iyo Guddiga Joogtada ah ee Golaha Shacabka JFS.

Kulanka oo uu guddoominayay Guddoomiyaha Golaha Shacabka, Aadan Maxamed Nuur ( Aadan Madoobe), ayaa looga wada hadlay xoojinta wada-shaqeynta ka dhaxeysa Hay'adaha Fulinta iyo Sharci dajinta.

Xamsa, ayaa ku bogaadiyey Golaha, ansixinta shuruucda muhiimka u ah dalka, gaar ahaan arrimaha deyn cafinta iyo amniga dalka, i"yagoo guddanaya waajibkooda Dastuuriga ah , waxuuna ka codsaday in ay meel mariyaan shuruucda wali horyaala iyo kuwa la horkeeni doono ee dalka muhiimka u ah".

Xukuumaddiisa ayuu tilmaamay Ra'iisul Wasaaruhu in ay diyaar u tahay korjoogteyn iyo la xisaabtan, maadaama hadafkeedu uu yahay dowlad-wanaagga iyo la dagaallanka Musuq-maasuqa.

Guddiga joogtada ayuu uga mahadceliyey wada-shaqeyntooda dhow, waxa uuna hoosta ka xariiqay in heshiis walba oo siyaasadeed oo ay gaaraan Golaha Wadatashiga Qaranka, la horkeeni doono Golaha Shacabka, si waafaqsan Dastuurka iyo Xeer-hoosaadka Golaha.

GAROWE ONLINE