Xasan Sheekh: Wiilku si kasta oo uu u dadaalo aabihiis uma abaal gudikaro

Dhankiisa, madaxwayne Geelle ayaa ka mahad celiyay soo dhaweynta diiran iyo martisoorka.

MUQDISHO, Soomaaliya - Madaxweyne Xasan Sheekh Maxamuud ayaa Munaasabad casho sharaf ah oo ka dhacday Madaxtooyada ku maamuusay Madaxweynaha Jabuuti, Ismaaciil Cumar Geelle iyo Wafdigiisa.

Billad Qaran ayuu guddoonsiiyay Madaxweyne Ismaaciil Cumar Geelle taasoo uu xusay in uu ku mutay kaalintiisa dowlad-dhiska iyo garab istaagga dowladda iyo shacabka Soomaaliyeed

Xiriirka iyo iskaashiga ka dhaxeeya Soomaaliya iyo Jabuuti ayuu carabka ku adkeeyay in uu yahay mid ku dhisan wada dhalasho, wax wada-lahaansho iyo derisnimo.

"Caawa, waa habeen taariikhi ah iyo fursad aan kor ugu qaadeyno walaalnimadeenna. Wiilku si kasta oo uu u dadaalo Aabihiis uma abaal gudikaro, inaguna sidaas oo kale ma gudikarno abaalka iyo kaalinta lama ilaawaan ee ay noo galeen walaalaheenna Jabuuti," ayuu Xasan Sheekh yiri.

Dhankiisa, Geelle ayaa ka mahad celiyay soo dhaweynta diiran iyo martisoorka heerka sare ah ee loo sameeyay ayaa adkeeyay in la xoojiyo isku-duubnimada shacabka Soomaaliyeed si looga gudbo caqabada ku xeeran hirgalinta himmilooyinka labada dal iyo shacab ee walaalaha ah.

GAROWE ONLINE