Xeer-ilaalinta oo dalbatay in toogasho lagu xukumay askari dilay Bajaajle

MUQDISHO, Soomaaliya – Maxkamada Ciidamada Soomaaliya ayaa maanta oo Sabti ah waxaa kasoo muuqday askari ka tirsan bileyska oo dilay Bajaajle.

Cali Maxamuud Maxamed ayaa loo haystaa in uu isgoyska Tarbuunka, degmada Hodan ee Muqdisho uu 8-dii Maaj ku khaariyey marxuum C/risaaq Yuusuf Guure.

Dacwad oogeyaasha oo sheegay in caddeymaha iyo marqaatiyaasha ay muujinayaa "in falku ahaa ola kac" ayaa cod-saday in dil toogasho lagu xukumay Cali.

Hasayeeshee, qareenada difaacaya eedeysanaha ayaa ku doodaya in askariga uu ku guda jiray gudashada waajibaadkiisa qaran xiliga uu shilku dhacayey.

Qareenada ayaa cod dheer ku qeexay in Booliska uu bixin doono diyadda [magta], waxayna dalbadeen in xorriyadiisa loo celiyo Cali Maxamuud Maxamed.

Gudoonka Maxkamada oo soo xiray fadhiga kaasoo saacado badan qaatay ayaa shaaciyey in go'aanka ugu dambeeya ay qoraal ahaan kusoo saari doonan.

Sikastaba ha ahaatee, dhageysiga maxkamadeynta Dable Cali ayaa waxaa goobjoog ka ahaa askartii ay wadashaqeynayeen si ay ugu waano qaataan.

Waa markii ugu horeysay inta la xusuusan yahay in askari ka tirsan Booliska maxkamad loosoo taago dilka Bajaajle kaasi oo bilooyinkii dambe korortay.

GAROWE ONLINE