Xildhibaan Fowsiyo oo si rasmi u shaacisay inay u taagan tahay xilka Guddoomiyaha Midowga Afrika

Doorashada Xilkan ayaa la qaban doonaa 25-ka Febraayo ee sanadka soo soocda.

Muqdisho, Soomaaliya - Xildhibaan Fowsiyo Xaaji Aadan oo ka mid ah Golaha Shacabka BJFS ayaa si rasmi ah ugu dhawaaqday inay tahay murashax u taagan xilka Guddoomiyaha Ururka Midowga Afrika, ka dib shir jaraa'id oo ay ku qabatay magaalada Muqdisho.

Marwo Fowsiyo ayaa ku nuux-nuuxsatay muhiimadda uu Soomaaliya u leeyahay xilkan, iyadoo xustay in qofka xilkan qabta uu faa’iido u horseedi karo dalka iyo guud ahaan qaaradda Afrika.

Waxay intaas ku dartay: “Soomaaliya waxay isku dayday inay jagadan hesho 1970-meeyadii, laakiin kuma aysan guuleysan, weligeedna ma qaban, balse markaan waxaa guddoonka leh bariga, waxaana ka sharaxan annaga iyo Kenya.”

Xildhibaan Fowsiya ayaa hadalkeeda ku soo gebegabeysay in Soomaaliya fursad aad u sarreysa ay u leedahay hanashada xilkan doorashadiisa la qaban doono 25-ka Febraayo ee sanadka soo soocda haddii lagu bixiyo dadaal ku filan.

Xildhibaanada Golaha Shacabka ayaa dhawaan ugu deeqay lacag dhan 500$ oo Mushaarkooda ah si ay ugu taageeraan musharaxnimada Xildhibaan Fowsiya, xilli la filayo in Madaxda dalka ay iyaguna ka qeyb qaataan dadaalkaan.

GAROWE ONLINE