Xildhibaanno cusub oo lagu dhaariyay Muqdisho [Magacyadooda]
-
Wariyaha Muqdisho Garowe Online
- Posted On 10-03-2018, 02:14PM
MUQDISHO, Soomaaliya - Xildhibaanno cusub oo kusoo biiray Gollaha Shacabka ee Baarlamaanka Federaalka Soomaaliya, ayaa maanta oo Sabti ah lagu dhaariyay magaalada Muqdisho.
Saddex Xildhibaan oo buuxiyay Kuraastii ka banaanayd Gollaha Shacabka, oo matala Somaliland, HirShabelle iyo Jubbaland ayaa lagu dhaariyay xarunta Dugsiga Tababarka Booliska Jeneraal Kaahiye oo lagu daaf-furay kalfadhiga 3aad ee Baarlamaanka.
Magacyada Xildhibaanada:
1 - Fataax Saciid Xasan, oo bedelay Aabihiisa Saciid Xasan Geedo oo geeriyooday sanadkii 2017-kii [Somaliland]
2 - Maxamuud Cabdullaahi Siraaji, oo bedelay Cabaas Siraaji, Wasiirkii Howlaha Guud oo Muqdisho lagu dilay 2017-kii [Jubbaland].
3 - Nuur Iidow Beyle, oo kasoo galay HirShabeelle, isagoo ka guuleystay Cabdullaahi Maxamed Cali "Sanbaloolshe" oo Kuriga baneeyay markii Taliyaha NISA looo magabaacay 2017-kii.
Gudoomiyaha Maxkamadda Sare ee Soomaaliya, Ibraahim Iidle Suleymaan ayaa dhaariyay Xildhibaanada cusub ee kusoo biiray maanta Gollaha Shacabka ee Baarlamaanka.
Gollaha Shacabka waxaa ka banaan hadda hal kursiga oo uu ka geeriyooday 2017 Bootaan Ciise Caalin, kaasi oo deegaan doorashadiisu yahay Galmudug.
GAROWE ONLINE
