Xog laga helay bartilmaameedka qaraxii ka dhacay Muqdisho

MUQDISHO, Soomaaliya - Ugu yaraan hal qof ayaa ku dhintay, laba kale way ku dhaawacmeen markii qarax gaari uu duhurnimadii maanta uu ka dhacay isgoyska Taleex ee bartamaha magaaladda Muqdisho.

Shaqsiga geeriyooday oo magaciisa lagu sheegay Muniir Saalax Cumar ayaa saarnaa gaariga qarxay, sida ay xaqiijiyeen saraakiisha booliska.

Mid kamid ah dadka loola cararay goobaha caafimaadka ayaa ahaa Aabaha dhalay Muniir, kaasi oo dhaawac uu kasoo gaarey qaybaha hoose ee jirkiisa.

Suxufiyiin meesha ay wax ka dhaceen tegay ayaa soo wariyay in Saalax uu ku qeylinayay "qaraxa waxaa noogala xiray geerish".

Hay’adaha amniga Soomaaliya ayaa sheegaya in bartilmaameedka qaraxa uu ahaa Aabaha, kaasi oo kamida ganacsatada Muqdisho.

Ma jirto koox sheegatay mas'uuliyada weerarkaasi, balse Al-Shabaab ayaa maalmihii u dambeeyay howlgalo noocaan ah ka fulineysa caasimada.

Maalin kahor ayay ahayd markii macalin Jaamacadeed lagu dilay qarax loogu xiray gaarigiisa oo ka dhacay xaafada Black Sea ee degmada Hodan.

Sabtidii lasoo dhaafay weerar is-miidaamin iyo mid toos ah oo lagu qaaday dhismo ay degan yihiin wasaaradaha Shaqada iyo Howlaha Guud waxaa lagu khaarijiyay 15 ruux oo ku jiro wasiir ku xigeenkii Shaqaalaha.

Magaala madaxda dalka leh xeebta ugu dheer Afrika ayaa wehel u noqotay qaraxyo tan iyo ciidamada AMISOM ay dalka soo galeen ayna kooxda xiriirka la leh Al-Qaacida ka saareen Muqdisho.

HOOS KA DAAWO MUUQAALKA

GAROWE ONLINE