Xubno kasoo "goostay" Al-Shabaab oo lasoo bandhigay [Sawirro]

KISMAAYO, Soomaaliya - Hay'adda Nabad Sugidda Jubbaland, ayaa shalay magaalada Kismaayo ee xarunta gobolka Jubbada Hoose, kusoo bandhigtay rag la sheegay inay kasoo goosteen Al-Shabaab, islamarkaana isku soo dhiibay maamulka Axmed Madoobe.

Saraakiisha Nabad Sugida iyo Sirdoonka Jubbaland waxay sheegeen in Xubnahaan oo gaaraya 12 ay isa-soo dhiibistooda ka dambeysay markii xiriiro la soo sameeyeen Saraakiisha Ciidamada Jubbaland.

"Ragaan waa kuwa Al-Shabaab uga dagaalamayey Baar-sanguuni iyo Cabdalla Biroole," ayaa lagu yiri qoraal kasoo baxay Hay'adda Nabad Sugida iyo Sirdoonka maamulka Jubbaland.

Ma jiro war kasoo baxay Kooxda Al-Shabaab oo ku saabsan inay jiraan Rag iyaga ka tirsan, oo kasoo goostay, islamarkaana isku dhiibay Jubbaland, oo dagaal ay ku jirto.

Hasa yeeshee, maalmihii udambeeyay ciidamadda xooga ee ku sugan deegaanada Jubbaland, oo ka garab ka helaya kuwa Daraawiisha, iyo ciidamo AMISOM iyo Mareykan ah ayaa dhaqdhaqaqyo ka waday halkaas.

GAROWE ONLINE