DF Soomaaliya oo soo bandhigtay qorshe ka dhan ah Al-Shabaab

MUQDISHO, Soomaaliya - Ra’iisul Wasaaraha Xukuumadda Federaalka Soomaaliya, Maxamed Xuseen Rooble, ayaa ka qayb galay kulan duco ah oo lagu xusayay dadkii ku dhintay weerarkii Soobe ee Muqdisho.

Ra’iisul Wasaaraha oo khudbad ka jeediyay munaasabadda xuska 14 oktoobar ayaa sheegay in qoys walba oo Soomaaliyeed ay gaartay dhibaatada ka dhalatay falkaas murugada leh ee ay ku shahiideen boqollaal muwaadiniin ah oo u taagnaa dib-u-dhiska iyo horumarka dalka.

Rooble oo ay ka qeybgalka ku wehliyeen mas'uuliyiin kale oo wasiiro iyo Xildhibaano isugu jiraan ayaa culimada ugu baaqay in bulashada ay ku hagaan sidii loo dabar jari lahaa fikirka xagjirka.

“Culimada Soomaaliyeed waxa ay kaalin muhiim ah kaga jiraan bulshada, sidaas awgeed waxaan ka codsanayaa inay xoojiyaan dadaalkooda ay kaga wacyigeliyaan halista fikirka argagixisada, si ubadkeenna wax ka barta madaarista quraanka loogu barbaariyo qiyamka udub-dhexaadka u ah diinteenna iyo in bulshada Soomaaliyeed u iftiimiyaan sida argagaxisadu ay sawirka xun uga bixinayso diinta”.

Xukuumadda cusub ee uu soo magacaabi doono ayuu carabka ku adkeeyay in ay ka shaqeyneyso sidii dib u eegis ugu sameyn lahayd siyaasadeeda ku wajahan la dagaalanka maleyshiyada Al-Shabaab.

Ra’iisul Wasaare Rooble ayaa tilmaamay in Dowladda ay xoogga saareyso tayeynta ciidanka, si ay uga ciribtiraan guud ahaan dalka kooxaha argagixisad ah ee u taagan dhibaateynta shacabka Soomaaliyeed.

Inta la xaqiijiyey 700 ruux oo u badan shacab ayaa ku naf-waayey, in ka badan tiradaas way ku dhaawacmeen, halka qaar kalana ay ku naafoobeen dhacdadaas oo lagu eedeeyay xoogaga xiriirka la leh Al-Qaacida.

GAROWE ONLINE