Dad aad u badan oo ku dhintay Itoobiya iyo kuwa la baadi-goobayo

Dhul Go' ka dhashay roob xooggan oo ka da’ay deegaan fog oo ka tirsan koonfurta Itoobiya ayaa dilay ugu yaraan 230 qof. Saraakiisha ayaa sheegay in dadka intooda badan ay dhinteen xilli ay isku dayayeen in ay badbaadiyaan dadkii dhoobo ku soo rogmatay.

Ra'iisul wasaaraha dalka ayaa ku tilmaamay "khasaare aad u xun." Ilaa hadda si rasmi ah looma oga inta qof ee ilaa hadda aan meelna laga hayn.

Mar sii horreysay, Waaxda Arrimaha Isgaarsiinta ee aagga Gofa, oo soo xiganeysa sarkaal maxalli ah, Habtamu Fetena, ayaa sheegtay in 146 qof ay naftooda ku waayeen musiibada.

Habtamu ayaa sheegay in la helay meydadka 96 rag ah iyo 50 dumar ah, isagoo intaa ku daray in baaritaanku uu si xooggan u socdo, wuxuuna ka digay in tirada dhimashada ay sii kordhi karto.

Sawiro lagu baahiyay baraha bulshada ee maamulka Gofa ayaa muujinayay dadka deegaanka oo sitay meydadka dadka dhintay oo saran bareelo ka sameysan cooshado, qaarkoodna ay ku duuban yihiin baco.

Itoobiya, oo ah dalka labaad ee ugu dadka badan Afrika oo ay ku nool yihiin 120 milyan oo qof, ayaa aad ugu nugul masiibooyinka cimilada oo ay ka mid yihiin fatahaado iyo abaaro.

Gudoomiyaha Gudiga Midowga Afrika Moussa Faki Mahamat ayaa sheegay in "qalbigeena iyo ducadeena" ay la garab taagan yihiin qoysaska dhibanayaasha.

GAROWE ONLINE