General Burhan: Khartoum waa xor, waa ka adkaanay RSF 

KHARTOUM, Sudan - Hoggaamiyaha Milatariga Suudaan, General Abdel Fattah al-Burhan, ayaa si taariikhi ah ugu soo laabtay Madaxtooyada Khartoum Arbacadii, kaddib markii ciidanka milatariga ay dib u qabteen gacan ku haynta aaggaas iyo garoonka diyaaradaha ee magaalada.

Tani waa dhacdo muhiim ah oo ka turjumeysa isbeddel weyn oo ku yimid dagaalka ka socda dalka Suudaan, iyadoo Ciidamada Suudaan ee Qaranka (SAF) ay xooggooda ku qaateen gacanta ugu badan ee caasimadda Khartoum, kadib markii ay ka guuleysteen xoogagga RSF).

Golaha Hogaanka Millatariga ee Isbeddelka Suudaan, oo ah dowladda ku meel gaarka ah ee dalka, ayaa shaaca ka qaaday galabnimadii Arbacada in taliyaha ciidamada, Gen. Burhan, oo sidoo kale madax ka ah Golaha Isbeddelka, uu gaaray magaalada Khartoum.

Sawirrada ay soo saareen Ciidamada Suudaan ee Qaranka ayaa muujinaya Gen. Burhan oo ku sugan Madaxtooyada Khartoum. Tani waa markii ugu horeysay oo Burhan uu ku soo laabto Madaxtooyada muddo ku dhow laba sano, maadaama kooxaha RSF ay haysteen madaxtooyada iyo inta badan Khartoum, tan iyo markii uu bilowday dagaalka.

Gen. Burhan ku sheegay, "Khartoum waa xor; waa dhammaatay."

Dagaalka Sokeeye ee Suudaan oo salka ku haya loolan dhanka awoodda iyo xukunka oo u dhaxeeya labo Jeneraal ayaa waxaa lagu dilay in ka badan 26,000 oo qof, iyadoo dalka dadkiisa ay waayeen riyadoodii inay dowlad dimuqraadi ah helayaan markii la riday Al-Bashiir.

GAROWE ONLINE