Itooboya oo ka hadashay Hubkii lagu qabtay Caabudwaaq

ADDIS ABABA - Dowladda Itoobiya ayaa beenisay warar lagu faafiyay baraha bulshada oo lagu sheegay in Itoobiya ay ku lug leedahay ganacsato hub sharci darro ah oo hub sharci darro ah ka soo galisay Soomaaliya 15-kii bishii July ee sanadkan.

Afhayeenka Wasaaradda Arrimaha Dibadda ee Itoobiya, Nebiyu Tedla, ayaa VOA u sheegay Talaadadii in arrintan aysan khusayn Itoobiya, wuxuuna carrabka ku adkeeyay "in ay ku jirto mas'uuliyadda dowladda federaalka ah ee Soomaaliya si ay u maareyso diiwaan-gelinta, gacan-ku-haynta iyo qaybinta hubka heer qaran."

Mar wax laga weydiiyay in dowladda Itoobiya ay hubkaasi ka iibisay dowladda Soomaaliya ama ganacsato gaar ah ayuu Tedla ka gaabsaday inuu ka hadlo.

Ugu yaraan 12 qof ayaa ku dhintay kadib markii ciidamada dowladda iyo maleeshiyaad deegaanka ah ay ku dagaalameen labo gaari oo hub ah oo laga keenay xadka Itoobiya. Shilkan ayaa ka dhacay tuulada Shiilamow oo qiyaastii 20 KM dhanka waqooyi-galbeed kaga beegan magaalada Caabudwaaq, una dhaw xadka Itoobiya.

Wasaaradda amniga gudaha ayaa sheegtay in ciidamada nabadsugidda dowladda ay hubkaasi ka soo qabteen “ka ganacsada hubka sharci darrada ah”, isla markaana ay galbinayeen markii maleeshiyaad hubeysan ay isbaaro dhigteen oo ay hubka ka qabteen. Sida uu sheegay sarkaal, maleeshiyaadkii deegaanka ayaa ka awood roonaaday ciidamada dowladda ka dib markii ay ka heleen ciidamo beeleed.

Ma jirto cid sheegatay inay iska leedahay hubkan, iyadoo dowladda Soomaaliya ay baaritaan ku wado arrintan.

GAROWE ONLINE