Koonfur Afrika: Toogasho wadareed lagu dilay ku dhowaad 20 qof
-
WARIYAHA AFRIKA GAROWE ONLINE
- Posted On 29-09-2024, 06:18AM
NAIROBI, Kenya - 17 qof ayaa lagu dilay toogasho wadareed ka dhacday magaalo fog oo Koonfur Afrika ku taal, iyadoo lagu raad joogo sidii loo heli lahaa raggii falkan geystay, sida ay booliisku sheegeen.
Labo guri oo isku mid ah oo ku yaalla magaalada Lusikisiki, ee gobolka Eastern Cape, ayaa la beegsaday, sida ay booliisku sheegeen, iyadoo 12 dumar ah iyo hal nin lagu dilay hal goob, halka saddex dumar ah iyo hal nin lagu dilay goob labaad.
Dhibbanaha 18-aad ayaa ku jira xaalad halis ah isbitaalka, sida uu sheegay adeegga booliiska Koonfur Afrika.
Wasiirka booliiska Senzo Mchunu ayaa la filayaa in uu booqdo goobta uu weerarku ka dhacay.
Koonfur Afrika ayaa ka mid ah dalalka ugu badan ee dilalka ka dhaca caalamka, sida lagu sheegay warbixintii ugu dambeysay ee xafiiska Qaramada Midoobay u qaabilsan dambiyada iyo daroogada.
Waxaa jiray in ka badan 27,000 oo dil sanadkii 2022 - oo u dhiganta 45 qof 100,000kiiba, oo ka mid ah ku dhawaad 60 milyan oo qof. Marka la barbardhigo, heerka Maraykanku waa lix 100,000kiiba.
GAROWE ONLINE
