Ku dhowaad 150 qof oo ku dhimatay dab qabsadey booyad shidaal

Dabka ayaa qabsaday gaariga rogmaday, kaasoo ay ciidamada la wareegeen kaddib markii uu shil galay.

NAIROBI, Kenya - Booyad shidaal ayaa ku qaraxday habeen hore waqooyiga Nigeria, waxaana ku dhintay ugu yaraan 147 qof oo u soo yaacay goobta shilku ka dhacay si ay u ururiyaan shidaal soo daatay, sida ay saraakiishu sheegeen.

Dabka ayaa qabsaday gaariga rogmaday, kaasoo ay ciidamada la wareegeen kaddib markii uu shil galay, sida ay booliisku u sheegeen BBC-da.

Ku dhawaad ​​100 qof oo kale oo ku dhaawacmay qaraxa ayaa la dhigay isbitaal ku yaala magaalada Ringim ee gobolka Jigawa ee u dhow, kuwaasi oo qaar badan oo ka mid ah ay xaaladoodu aad u liidato.

Saraakiisha ayaa dadka uga digay in aysan u dhawaan booyada shilka ka dib habeenimadii Talaadada, laakiin way u suurta geli waayeen in ay xakameeyaan dadka isa soo tarayay, ayuu yiri afhayeenka bilayska Lawal Shiisuu Adam.

"Waxaan isku daynay intii karaankeena ah inaan joojino dadka u socda gaariga si ay shidaal u qaataan, laakiin inkastoo aan xirnay goobta, waa nalaga itaal roonaaday, dadkuna markii ay xaaqayeen shidaal ayuu dab qabsaday," ayuu u sheegay BBC-da.

Shilkan ayaa ka dhacay magaalada Majia ee waqooyiga gobolka Jigawa saacadu markay ahayd 23:30 xiliga maxaliga ah (22:30 GMT), ayuu yidhi.

GAROWE ONLINE