Madaxweynaha Rwanda oo Ku Baaqay In Wada-hadal Lagu Xaliyo Colaadda Congo 

Kigali, Rwanda – Madaxweynaha Rwanda, Paul Kagame, ayaa ku baaqay in dowladda Congo ay wada-hadal toos ah la furto kooxda hubeysan ee M23, taas oo maalmihii lasoo dhaafay qabsatay magaalooyin muhiim ah oo ku yaalla bariga Jamhuuriyadda Dimuqraadiga ee Congo. Kooxdan ayaa sii ballaarisay gacanta ay ku hayso gobolka xuduudka la leh Rwanda.

M23, oo ah mid ka mid ah in ka badan 100 kooxood oo hubeysan oo isku dayaya inay ka taliyaan degaanka khayraadka badan ee ku dhow xuduudda Rwanda, ayaa sanadkii hore ka barakiciyay in ka badan hal milyan oo qof dagaalka gobolka. Bishii hore, M23 ayaa qabsatay magaalooyinka Katale iyo Masisi, iyadoo Masisi ay 80 kiiloomitir (49 mayl) galbeed kaga beegan tahay caasimadda gobolka ee Goma, oo ah marin istiraatiiji ah oo gala gudaha Congo.

Kagame ayaa kula hadlayay warbaahinta magaalada Kigali isagoo sheegay in diidmada wada-hadalka lala yeesho M23 ay muujinayso rabitaan la'aan lagu doonayo xal siyaasadeed oo loo helo colaadda.

“Waa in la dadaalo si xal loogu helo dhibaatadan,” ayuu yiri Kagame. “Xalka waxa uu ku jiraa hab siyaasadeed gudaha ah, ama wada-hadal.”

Si kastaba ha ahaatee, dowladda Congo ayaa si cad u diiday talooyinka Kagame ee ku saabsan wada-xaajoodka lala yeesho M23, iyadoo ku eedaysay Rwanda inay taageerto kooxdaas. Warbixin ay soo saareen khubaro ka tirsan Qaramada Midoobay ayaa lagu qiyaasay in ilaa 4,000 oo askari oo Rwandan ah ay ku sugan yihiin Congo.

M23 ayaa magaceeda ka soo qaadatay heshiis nabadeed oo la saxiixay Maarso 23, 2009, kaas oo ay ku eedaysay dowladda Congo inay ku fashilantay hirgelintiisa. Kooxdan ayaa mar qabsatay magaalada Goma 10 sano ka hor, hase yeeshee waxay ka soo muuqatay dib-u-soo-noqosho xooggan sanadkii 2021, tan iyo markaasna waxay la wareegtay dhul ballaaran oo ku yaalla bariga Congo.

Bishii Luulyo, Congo ayaa heshiis xabad-joojin la saxiixatay M23, kaas oo dhaqan galay bishii Agoosto. Si kastaba, dagaalka ayaa dib u qarxay, iyadoo dowladda Mareykanka ay sheegtay inay “aad uga walaacsan tahay” jebinta xabad-joojinta ee ay ku kacday M23.

GAROWE ONLINE