Xildhibaan kamid noqdey dad lagu xiray banaanbaxyo ruxay Kenya

Ugu yaraan 53 qof oo mudaaharaadayaal ah oo aan hubaysnayn ayaa lagu xiray guud ahaan dalka Kenya.

NAIROBI, Kenya - Tobanan mudaaharaadayaal ah ayaa waxaa lagu xiray gudaha waddanka Kenya intii ay socdeen isku dhacyada u dhexeeya booliiska iyo dibad-baxayaasha, sida ay sheegeen kooxaha xuquuqul insaanka.

Banaanbaxayaasha ayaa waxa ay ka caroodeen mowjado kiisas ah oo la sheegay in lagu afduubay dad dowladda dhaleeceynaya kuwaasoo u badan mucaaradka William Ruto.

Dhammaadkii todobaadka, madaxweynaha Kenya William Ruto ayaa ballan qaaday in uu soo afjari doono afduubka – taasoo u muuqata in uu kor u kac ku yimid hoggaamiyaha oo markii hore ku tilmaamay dadka la la’yahay “war been abuur ah”.

Dibadbaxyada looga soo horjeedo afduubka ayaa sii socday Isniintii, iyadoo booliska ay ku rideen sunta dadka ka ilmeysiisa si ay u kala eryaan dad isugu soo baxay magaalada caasimadda ah ee Nairobi.

Ugu yaraan 53 qof oo mudaaharaadayaal ah oo aan hubaysnayn ayaa lagu xiray guud ahaan dalka Kenya, sidda uu sheegay guddiga qaran ee xuquuqul insaanka ee Kenya (KNCHR) oo ay dowladdu maalgeliso.

Xariga mucaaradka ayaa laga yaabaa inuu sii huriyo mudaaharaadyada ka dhanka ah afduubka ee ka socda dalka ku yaalla bariga qaarada hodanka ah ee Afrika.

Ugu yaraan 82 qof oo dhaleeceeyay dowladda ayaa la waayay markii ay sameeyeen dhaq-dhaqaaq mudaaharaad ah – oo ay kiciyeen dhalinyarada Kenya – uu ka qarxay bishii June ee ka soo horjeeda sharciga maaliyadda ee muranka dhaliyay.

GAROWE ONLINE