Aqalka Cad oo ka warbixiyay su'aal uu madaxweynaha "si khaldan" u fahmay

WASHINGTON - Aqalka Cad ayaa dib uga laabtay hadal ka soo yeeray madaxweynaha Mareykanka Joe Biden oo ku sheegay in Israa’iil ay dib u dhigto weerarkeeda dhulka ee la filayo in ay ku qaado Qasa ilaa laga soo deynayo maxaabiis badan oo ay haystaan ​​Xamaas iyo kooxaha kale ee Falastiiniyiinta.

Wariye ayaa waydiiyay Biden hadii ay tahay in Israa'iil ay dib u dhigto hawlgalka dhulka ee Qasa, wuxuuna ku jawaabay: "Haa."

Laakiin Aqalka Cad ayaa xaqiijiyay in madaxweynaha Mareykanka "uusan maqlin su'aasha ku saabsan dib u dhigista Israa'iil ee duulaanka dhulka, wuxuuna u maleynayay in su'aashu ay tahay hadii uu raacsanyahay in la sii daayo maxaabiis badan."

Isagoo hadalkiisa sii wata ayuu yiri: “Madaxweynuhu wuu ka fogay wariyaha, mana uusan maqlin su'aasha”.

GAROWE ONLINE