Ciidamada Suudaan oo gaashaanka ku dhuftay Codsi uga yimid Iran

Tehran ayaa doonaysa awood dheeri ah oo ay ku yeelato marin biyoodyada istiraatiijiga ah.

Tehran (GO) - Sarkaal ka tirsan sirdoonka Suudaan ayaa wargeyska “Wall Street Journal” u sheegay in ciidanka Suudaan ay diideen dalab uga yimid Iran oo ahaa in Tehran saldhig ciidan ka samaysato badda cas.

Sida laga soo xigtay sarkaalka Suudaan, Iran waxay u soo bandhigtay ciidanka inay siiso markab dagaal oo awood u leh inuu qaado diyaaradaha qumaatiga u kaca iyo kuwa aan duuliyaha lahayn haddii ay ogolaato saldhigga milatari.

“Wall Street Journal” ayaa sheegtay in Iran ay rabtay inay la socoto isu socodka badda ee ka imaanaya Kanaalka Suweys iyo Israel.

Saraakiisha Maraykanka ayaa rumeysan in Tehran ay qorsheyneyso inay u adeegsato xiriirka ay la leedahay ciidamada Suudaan si ay awood dheeraad ah ugu yeelato marin biyoodyada istiraatiijiga ah ee Badda Cas.

GAROWE ONLINE