Dawladda Jarmalka oo ansixisay sharci fududeynayo helitaanka jinsiyadda

SAWIR HORE

BERLIN, Jarmalka - Dawladda Jarmalka ayaa Talaadada ansixisay sharci oo fududaynaya habraacyada lagu siinayo jinsiyadda dadka soogalootiga ah, loona ogolaanayo inay heystaan laba jinsiyadood.

Sida laga soo xigtay habraacyada cusub ee ay soo tebisay wakaaladda wararka ee Faransiiska, dhaqangelintooduna ay weli sugayso ansixinta baarlamaanka, helista jinsiyadda waxay suurtogal noqon doontaa degenaansho 5 sano ah ka dib halka ay hore u eheyd 8 sano.

Muwaadinima-doonka waxa uu baahan doonaa inuu caddeeyo inuusan ku tiirsanayn kaalmada dawladda, halka xaaladaha qaar laga reebi doono qodobkan, sida laga soo xigtay wakaaladda.

Waxayna wakaaladda wararka ee Jarmalku sheegtay in sharcigu u ogolaanayo dadka degen Jarmalka muddo 5 sano ah inay dalbadaan baasaboor Jarmal ah, waase haddii codsaduhu u hoggaansamo "qiyamka bulshada xorta ah".

Sidoo kale, waa in codsaduhu uu awoodi karo inuu maareeyo nolol maalmeedkiisa isagoon wax caawimaad ah ka helin dowladda.

GAROWE ONLINE