Iran oo Mareykanka ugu Hanjabtay "Aargoosi Aad u Adag" Haddii Trump uu Dib u Billaabo Dagaalka
-
GAROWE ONLINE
- Posted On 23-05-2026, 12:57PM
TEHRAN, May 23, 2026 — Guddoomiyaha Baarlamaanka Iiraan, ahna madaxa wada-hadallada ee dalkaas, Mohammad Bagher Ghalibaf, ayaa uga digay Madaxweynaha Mareykanka Donald Trump inuu qaado "tillaabo doqonnimo ah" oo uu dib ugu billaabo dagaalka, isagoo ku hanjabay inay wajihi doonaan jawaab ka xanuun badan tii maalintii koowaad.
Ghalibaf ayaa sheegay in ciidamada qalabka sida ee Iiraan si buuxda "dib loogu dhisay" intii uu socday xabbad-joojinta lixda toddobaad ah ee ka jirta gobolka Bariga Dhexe.
"Ciidankeena qalabka sida waxay dib u dhiseen awooddooda intii lagu guda jiray xabbad-joojinta. Haddii Trump uu ku kaco doqonnimo kale oo uu dagaalka dib u bilaabo, hubaal dharbaaxada ku dhici doonta Mareykanka waxay noqon doontaa mid aad u adag oo ka khadhaadh tii maalintii koowaad ee dagaalka," ayuu yiri Ghalibaf oo qoraal soo dhigay barta ay bulshadu ku kulanto.
Hanjabaaddan kulul ee ka timid dhanka Tehran ayaa timid ka dib markii uu Ghalibaf magaalada Tehran kula kulmay Taliyaha Ciidanka Pakistan, Field Marshal Asim Munir, oo isagu dhex-dhexaadin ka dhex wada dowladaha Washington iyo Tehran si loo badbaadiyo xabbad-joojintii jilicsanayd ee dhaqangashay 8-dii April.
Digniinta Iiraan ayaa sidoo kale kusoo aadeysa xilli ay soo baxayaan warar sheegaya in Trump uu si dhab ah u kaalmaynayo qaadista weeraro cusub oo ka dhanka ah Iiraan, haddii ay fashilmaan dadaallada diblomaasiyadeed ee daqiiqadaha ugu dambeeya.
GAROWE ONLINE
