Isbaheysiga Sacuudiga oo duqeeyay garoonka Sanca

Xulafadda ayaa bayaan ay soo saareen ku sheegay in ay kor u qaadeen ilaalinta goobo gaar ah oo ku yaalla garoonka.

WASHINGTON, USA - Isbaheysiga Sacuudiga uu hogaamiyo ee dagaalka ka wada dalka Yemen ayaa sheegay inay duqeymo dhanka cirka ah ku qaadeen bartilmaameedyada Xuutiyiinta ee ku sugan garoonka caalamiga ah ee caasimadda Yemen ee Sanca, sida ay ku warrantay warbaahinta dowladda Sacuudiga.

Duulaanka cirka ee Isniintii ayaa yimid wax ka yar saacad ka dib markii isbahaysigu uu ku booriyay dadka rayidka ah iyo hay'adaha Qaramada Midoobay inay si deg deg ah u guuraan.

Xulafadda ayaa bayaan ay soo saareen ku sheegay in ay kor u qaadeen ilaalinta goobo gaar ah oo ku yaalla garoonka, ayna weeraro ku qaadeen "bartilmaameedyo sharci ah oo milateri" oo halkaas ku yaalla.

Afhayeen u hadlay Hay’adda Qaramada Midoobay u qaabilsan Cunnada Adduunka ayaa sheegtay in koox ka tirsan Qaramada Midoobay ay ku sugan yihiin garoonka diyaaradaha si ay u xaqiijiyaan inta uu la egyahay khasaaraha.

Warbaahinta Saba oo ay maamulaan Xuutiyiinta, oo soo xiganeysa madaxa maamulka duulista hawada ee maamulka Xuuthiyiinta, ayaa sheegtay in garoonka la damiyay.

Duqeymaha ayaa lagu garaacay lix goobood, sida uu sheegay afhayeenka isbaheysiga, Sarreeye Guuto Turki al-Malki, oo ay ku jiraan meelaha loo isticmaalo weerarada laga soo abaabulo diyaaradaha aan duuliyaha lahayn, tababaridda shaqaalaha aan duuliyaha lahayn, tababarayaal hoy iyo kuwa tababaro, iyo kaydinta diyaaradaha aan duuliyaha lahayn.

Tan iyo sanadkii 2016, xulafada Sacuudiga uu hogaamiyo ayaa joojiyay duulimaadyada hawada ee garoonka Sanca marka laga reebo duulimaadyada bini'aadantinimo ee ay leeyihiin Qaramada Midoobay iyo ururada kale ee caalamiga ah. Xuutiyiinta waxaa la sheegaa in ay taageero dhaqaale ka helaan dowladda Iiraan.

GAROWE ONLINE