Israa'iil & XMS oo wadahadal uga socda qodobada heshiiska xabbad joojinta

Labada dhinac ayaa isku khilaafay tirada maxaabiista la sii deyn doono.

Qasa (GO) - Ilo xog ogaal ah ayaa shaaca ka qaaday in Israa'iil iyo Xamaas ay bilaabeen wada xaajood ku aadan faahfaahinta heshiiska xabbad-joojin ku-meel-gaar ah ee Qasa iyo sii deynta maxaabiista.

Heshiiskan aan wali la isla meel dhigin ayaa dhigaya sii deynta 400 maxaabiis falastiiniyiin ah, oo ay ku jiraan 15 ku xukuman xabsi daa'im ah, kuwaas oo lagu eedeeyay inay dileen Israa'iiliyiin, taas beddelkeedana ay Xamaas sii dayso 40 maxaabiis Israa’iili ah.

Dhanka kale, Xamaas oo jawaab ka soo saartay soo jeedintan ayaa soo jeedisay in la sii daayo 950 maxbuus oo ay ku jiraan 150 qof oo ku xukuman xabsi daa’im ah.

Israa'iil ayaa dhankeeda dalbatay in loo soo gudbiyo liiska magacyada maxaabiista weli nool, iyo in maxaabiista Falastiiniyiinta ah ee la sii dayn doono loo musaafuriyo waddan kale, laakiin Xamaas ayaa diiday.

GAROWE ONLINE