Itoobiya oo si adag uga jawaabtey eedeyn ka timid Mareykanka

Boqolaal kun oo qof ayaa lagu dilay Tigray, iyadoo qiyaasaha qaar ay sheegayaan in dhimashadu ay gaareyso 600,000.

ADDIS ABABA, Ethiopia - Dowladda Itoobiya ayaa ku eedeysay Mareykanka in uu qaaday "waddo dhinac u jaran-jeerta" kadib markii Washington ay ay Addis Ababa iyo ciidamada Eritrea la xiriirisay "dambiyo dagaal".

"Hadalka Maraykanku waa mid kicin ah," ayay tiri wasaaradda arrimaha dibadda Ethiopia oo war-saxaafadeed laba bog ah soo saartey Isniinta todobaadkan.

Bayaanka oo luuqad adag ku qornaa ayaa yimid maalin ka dib markii Washington ay ku eedaysay dhammaan dhinacyada isku haya colaada Tigray inay galeen dambiyo dagaal.

Mareykanka ayaa si gaar ah u tilmaamtay ciidamada Itoobiya, Eritereeya iyo kuwa gobolka Amxaarada oo ay ku eedeysay dambiyada ka dhanka ah bani'aadanimada.

Wasaaradda Arrimaha Dibadda Mareykanka ayaa afkeeda ka dhowrsatay in ay soo hadal-qaado ciidamada daacad u ah Jabhadda Xoraynta Shacabka Tigray (TPLF).

Toddobaadkii hore, xoghayaha arrimaha dibadda ee Maraykanka, Antony Blinken, ayaa booqashadiisii ​​ugu horreysay ku tagay Itoobiya tan iyo bishii November, 2022 markii la saxiixay heshiis nabadeed oo u dhexeeya dawladda federaalka iyo fallaagada Tigrayga.

Isniintii, ka dib markii uu ku laabtay Washington, wuxuu sameeyay baaq xoog leh oo ku saabsan isla xisaabtan ku wajahan "dambiyadda dagaal ee ka dhacay gobolka Tigray".

Boqolaal kun oo qof ayaa lagu dilay Tigray, iyadoo qiyaasaha qaar ay sheegayaan in dhimashadu ay gaareyso 600,000. Waxaa kaloo la sheegay in ay dhaceen kufsi, xasuuq loo geystay rayid, musaafurin iyo isir sifeyn.

GAROWE ONLINE