Kuuriyada Waqooyi oo Sheegtay in Hubkeeda Nukliyeerka uu yahay Gaashaan ay ku Difaacdo

PYONGYANG — Kuuriyada Waqooyi ayaa sheegtay in siyaasadda colaadeed ee Mareykanka ee ka dhanka ah Pyongyang aysan wax isbeddel ah ku imaan, iyadoo ku adkaysatay in hubkeeda nukliyeerka uu yahay dammaanad buuxda oo lagu ilaalinayo madax-bannaanideeda.

Warbaahinta dowladda Kuuriyada Waqooyi ayaa sheegtay in Pyongyang ay sii xoojin doonto awooddeeda nukliyeerka, iyadoo ku doodday in hubkaasi uu muhiim u yahay difaaca dalka iyo ilaalinta madax-bannaanidiisa.

Hadalkan ayaa kusoo beegmaya xilli xiriirka u dhexeeya Kuuriyada Waqooyi iyo Mareykanka uu weli yahay mid kacsan, iyadoo labada dhinac ay ku kala aragti duwan yihiin arrimaha hubka nukliyeerka iyo cunaqabateynta saaran Pyongyang.

Kuuriyada Waqooyi ayaa muddo dheer ku dooday in joogitaanka ciidamada Mareykanka ee Kuuriyada Koonfureed iyo dhoolatusyada militari ee Washington iyo Seoul ay khatar ku yihiin amnigeeda.

Pyongyang ayaa sidoo kale marar badan sheegtay in aysan ka tanaasuli doonin barnaamijkeeda nukliyeerka, iyadoo u aragta awoodda nukliyeerka inay tahay tiir muhiim u ah istiraatiijiyadda difaaca qaranka.

Mareykanka, dhanka kale, wuxuu si joogto ah ugu baaqayaa Kuuriyada Waqooyi inay ka tanaasusho hubkeeda nukliyeerka iyo gantaallada ballistic-ga, iyadoo Washington ay taageerto cunaqabateyn caalami ah oo lagu cadaadinayo Pyongyang.

Kuuriyada Waqooyi ayaa sheegtay in haddii siyaasadda Mareykanka aysan isbeddelin, ay iyaduna sii wadi doonto xoojinta awooddeeda militari iyo nukliyeerka.

Hadallada cusub ayaa muujinaya in rajada laga qabo diblomaasiyad cusub oo dhex marta Pyongyang iyo Washington ay weli wajahdo caqabado waaweyn, iyadoo arrinta nukliyeerka ay tahay qodobka ugu weyn ee khilaafka labada dhinac.

GAROWE ONLINE