Madaxweynaha Iiraan oo ku geeriyoodey shil diyaaradeed

Raisi ayaa ku sugnaa Azerbaijan horraantii Axadda maanta ah si uu u daah furo biyo-xireen isaga iyo Madaxweynaha Asarbayjan Ilham Aliyev.

TEHRAN, Iran - Madaxweynaha Iran Ebrahim Raisi iyo Wasiirka Arrimaha Dibadda Hossein Amir Abdollahian ayaa ku dhintay shil diyaaradeed.

Kooxda gurmadka iyo badbaadinta oo gaaray goobta shilka helikobtarka ayaa xaqiijiyay in aysan jirin cid ka badbaaday shilka, sida laga soo xigtay wakaaladda wararka ee IRINN iyo wakaaladda wararka ee Mehr.

Raisi ayaa ku sugnaa Azerbaijan horraantii Axadda maanta ah si uu u daah furo biyo-xireen isaga iyo Madaxweynaha Asarbayjan Ilham Aliyev. Biyo-xireenkan ayaa ah kii saddexaad ee ay labada dal ka dhisteen wabiga Aras.

Warbaahinta dowladda Iran ayaa ku warantay in shilkan uu ka dhacay meel u dhow Jolfa, oo ah magaalo xuduudeed qiyaastii 375 mayl waqooyi galbeed kaga beegan caasimadda Tehran.

Iran ayaa saaran cunaqabataynta caalamiga ah taasoo ka dhigaysa mid ku adag dowladda in ay soo iibsato diyaarado cusub oo casri ah. Diyaaradeeda militariga ayaa la isticmaalayaa tan iyo 1979kii markii uu dhashay Kacaanka Islaamiga.

GAROWE ONLINE