Madaxweynaha Iiraan oo mar kale u hanjabay maamulka Yahuuda

Xukuumadda Tehran ayaa wacad ku martay in ay u aargudi doonto Ismaaciil Haniyah.

DOOXA, Qadar - Ciidamada Israel ayaa duqeeyay labo iskuul ku yaala magaalada Gaza, iyagoo dilay ugu yaraan 30 Falastiiniyiin ah, sidda laga soo xigtay warbaahinta maxaliga ah.

Dhakhaatiirta caafimaadka ayaa sheegay in boqolkiiba 80 dadka lagu dilay laguna dhaawacay iskuulada Hassan Salama iyo Nassr ay ahaayeen caruur.

Dhanka kale, Madaxweynaha Iran Masoud Pezeshkian ayaa mar kale ballan qaaday in uu ka aargudan doono dilka Ismaaciil Haniyah, isagoo u sheegay wasiirka arrimaha dibadda ee Jordan oo booqasho ku jooga in Israa’iil ay "khalad weyn" ku sameysay dilka hoggaamiyaha Xamaas.

Hezbollah ayaa sheegtay in ay koox ka mid ah diyaaradaha aan duuliyaha lahayn ku dishay xeryaha ciidamada Israa’iil qeybta 91-aad ee Ayelet HaShahar. Milateriga Israa'iil ayaa sheegay in laba askari ay "dhaawac dhexdhexaad ah" ka soo gaareen weerarka.

Geesta kale, Madaxweynaha Maraykanka Joe Biden ayaa la filayaa inuu la hadlo Boqorka Jordan Boqor Cabdallah uuna isugu yeero kooxdiisa amniga qaranka si uu ugala hadlo xiisadaha sii xumaanaya ee ka taagan Bariga Dhexe.

Dhinaca kale, Talyaaniga iyo Turkiga ayaa ku biiray wadamo badan oo muwaadiniintooda ugu baaqaya in ay isaga baxaan Lubnaan iyadoo laga cabsi qabo in gobolka uu dagaal ka qarxo.

GAROWE ONLINE