Maxkamad ku taalla Israa’iil oo hakisay qorshe xabsiga Ketziot lagu hareereynayo yaxaasyada

ISRAEL - Maxkamad ku taalla Israa’iil ayaa si ku-meel-gaar ah u hakisay qorshe uu wasiirka Amniga Qaranka, Itamar Ben-Gvir, doonayay in xabsiga Ketziot lagu hareereeyo yaxaasyada.

Go’aanka maxkamadda ayaa yimid kaddib markii urur u dooda xuquuqda xayawaanka uu caqabad sharci ah ka keenay qorshaha. Ururku wuxuu maxkamadda ka codsaday in la joojiyo tallaabada lagu doonayo in yaxaasyada lagu isticmaalo ilaalinta xabsiga.

Qorshaha Ben-Gvir ayaa ahaa in yaxaasyada lagu sii daayo meelaha ku hareeraysan xabsiga, iyadoo la doonayo in looga hortago in maxaabiistu ka baxsadaan xabsiga.

Maxkamaddu waxay hadda si ku-meel-gaar ah u joojisay hirgelinta qorshaha, iyadoo arrinta loo baahan yahay in laga gaaro go’aan kama dambeys ah.

Xabsiga Ketziot, oo ku yaalla koonfurta Israa’iil, ayaa lagu hayaa maxaabiis Falastiiniyiin ah, oo ay ku jiraan dad laga qabtay Marinka Gaza.

GAROWE ONLINE