Netanyahu oo shir amni oo degdeg ah isugu yeeray kadib gantallo lagu garaacay waqooyiga Israa’iil

TEL AVIV, Israa’iil – Ra’iisul Wasaaraha Israa’iil Benjamin Netanyahu ayaa isugu yeeray kulan amni oo degdeg ah si loo qiimeeyo xaaladda amniga ee waqooyiga Israa’iil, kaddib xiisadda sii kordheysa ee la xiriirta duullaanka Tel Aviv ka waddo koonfurta Lubnaan, sida ay werisay warbaahin gudaha ah.

Telefishinka Channel 13 ayaa sheegay in Netanyahu uu kulanka degdegga ah la yeelan doono Wasiirka Difaaca Israel Katz, Taliyaha Ciidamada Israa’iil Eyal Zamir, iyo saraakiil sare oo ka tirsan ciidamada ku sugan waqooyiga dalka.

Warbixintu waxay sheegtay in milatariga Israa’iil uu la yaabay baaxadda weerarrada gantaallada iyo go’aanka Hezbollah ee ku aaddan beddelka istaraatiijiyadda rasaasta, taasoo jawaab u ah ballaarinta hawlgallada dhulka ee Israa’iil ka waddo koonfurta Lubnaan.

Sida lagu sheegay warbixinta, tobanaan gantaal ayaa Sabtidii laga soo tuuray gudaha Lubnaan oo lagu beegsaday waqooyiga Israa’iil, waxaana markii ugu horreysay tan iyo xabbad-joojintii bilaabatay 17-kii April ay gantaalladu gaareen magaalooyinka Safed iyo Nahariya.

Wararka ayaa sidoo kale sheegaya in xaaladda waqooyiga Israa’iil ay noqotay mid aad u kacsan, iyadoo lagu tilmaamay “jahawareer iyo xaalad aan la xakameyn karin,” inkastoo dowladda Israa’iil ay weli si rasmi ah uga hadlin walaacaas.

Dhanka kale, Idaacadda Ciidamada Israa’iil ayaa sheegtay in ilaa 1,099 jeer ay seeriga digniinta ka dhawaadeen waqooyiga dalka tan iyo bilowgii xabbad-joojinta nugul ee Israa’iil iyo Hezbollah.

Hezbollah ayaa dhankeeda sheegatay inay fulisay weerarro diyaarado drone ah oo lagu beegsaday ciidamada Israa’iil ee ku sugan agagaarka deegaanka Natua iyo xarun milatari oo ku taalla kaynta Galilee ee waqooyiga Israa’iil.

Drones-ka Hezbollah ayaa noqday walaac amni oo sii kordhaya gudaha Israa’iil, iyadoo Netanyahu uu ku tilmaamay “khatar weyn” oo ay adag tahay in la ogaado lana soo rido.

Inkasta oo xabbad-joojin 45 maalmood ah lagu kordhiyay 17-kii May oo ay dhexdhexaadiyeen Mareykanka, Israa’iil ayaa weli sii wadday weerarrada ka dhanka ah Lubnaan.

Wasaaradda Caafimaadka Lubnaan ayaa sheegtay in tan iyo 2-dii Maarso ay duqeymaha Israa’iil ku dhinteen in ka badan 3,371 qof.

GAROWE ONLINE