Qasa: Dad badda ku geeriyooday iyagoo ka soo ururinaya gargaar ay diyaarado ku daadiyeen

Dadkan gaajaysan ayaa badda galay si ay u helaan gargaar ay diyaarado ku soo rideen.

Qasa (GO) - Xafiiska warfaafinta ee Xamaas ayaa xaqiijiyay Talaadadii in 18 qof ay dhinteen ka dib markii ay isku dayeen shalay oo Isniin ahayd, inay ururiyaan gargaar ay diyaarado ku soo daadiyeen badda iyo dhulka waqooyiga Marinka Qasa, oo uu ka socdo dagaal ba’an.

Xafiisku wuxuu sheegay in 12 ka mid ah ay ku dhinteen "ka dib markii ay ku qaraqmeen waqooyiga marinka Qasa, halkaas oo daraasiin muwaadiniin gaajaysan ay galeen badda si ay u helaan gargaar ay diyaarado ku soo rideen."

Ururka ayaa intaasi ku daray: "6-kale oo muwaadiniin ah ayaa sidoo kale ku dhintay isbuurasho ka dhacday dhowr meel iyaga oo doonayay inay helaan gargaar ay diyaaradaha soo rideen”.

Wasaaradda Caafimaadka Falastiin ayaa dhankeeda ku dhawaaqday in 7 qof oo reer Qasa ah ay dhinteen, xilli ay isku dayayeen in ay helaan gargaar ay diyaarado ku soo rideen baarashuudka oo ku dhacay badda.

GAROWE ONLINE