Sacuudi Carabiya oo beenisay in Wasiirka Ganacsiga uu la kulmay dhiggiisa Israel

Riyadh (GO) - Ilo rasmi ah ayaa beeniyey eedaynta lagu faafiyey baraha bulshada ee ku saabsan in kulan dhexmaray wasiirka ganacsiga iyo sarkaal Israa'iili ah.

War ay daabacday wakaaladda wararka Sucuudiga ayaa lagu yidhi, “Mas’uul ka tirsan Dowladda Sucuudiga ayaa beeniyey muuqaalka lagu wareejiyay baraha bulshada ee ku saabsan kulan uu Wasiirka Ganacsiga la yeeshay sarkaal Israa’iili ah”

Wakaaladdu oo soo xiganaysa mas’uulkan ayaa intaa ku dartay, “Muqaalku waxaa la qaaday xilli uu Wasiirka la taaganaa Wasiirka Ganacsiga Nigeria ka hor inta aanu furmin Shirweynaha Saddex iyo Tobnaad ee Wasiirrada Ururka Ganacsiga Adduunka ee ka dhacaya caasimadda Imaaraadka ee Abu Dhabi.

Qoraalka ayaa lagu sheegay in markaas uu u soo baxay sakraalka Israa'iiliga ah si uu u salaamo, ka dibna waxa uu isu sheegay in uu yahay Wasiirka Dhaqaalaha ee dawladda Israa’iil.

Wakaaladdu waxay sii wadataa, "Isha ayaa sidoo kale xaqiijisay mowqifka adag ee Boqortooyada Sacuudiga ee qadiyadda Falastiin iyo taageerada ay u fidiyaan dadka Falastiiniyiinta ah".

GAROWE ONLINE