Sacuudi Carabiya oo dacwad ka dhan ah Imaaraadka u gudbisay Qaramada Midoobay

Warbaahinta Maraykanka ayaa sheegtay inuu jiro "khilaaf sii kordhaya" oo u dhexeeya labada waddan.

Riyadh (GO) - Dukumeenti rasmi ah oo lagu daabacay website-ka Qaramada Midoobay ayaa shaaca ka qaaday diidmada Sacuudi Carabiya ee ku dhawaaqida Imaaraatka in dhulka "Al Yasat" uu yahay aag badeed la ilaaliyo.

Wasaaradda Arrimaha Dibadda Sacuudiga ayaa sheegtay, sida ku xusan qoraalka Qaramada Midoobay, in Boqortooyada “aysan aqoonsan... wax tallaabo ah oo ay qaado dowladda Imaaraadka Carabta kuna aadan aagga "Al Yasat" oo ku yaal xeebaha Sacuudiga.”

Ma jiro war rasmi ah oo ka soo baxay Imaaraadka.

Tani waxay ku soo beegmaysaa iyadoo warbaahinta Maraykanku ay sheegtay inuu jiro "khilaaf sii kordhaya" oo u dhexeeya labada waddan, kaas oo ku saabsan xiisada Yemen iyo go'aamada Ururka Waddamada Shidaalka dhoofiya (OPEC).

GAROWE ONLINE