Türkiye ma beenin duqeymaha Puntland, BBC-da waxay u sheegtay inaysan “xog ka hayn”

GAROOWE, Puntland — Dowladda Türkiye ayaan si rasmi ah u beenin duqeymaha lagu dilay ugu yaraan 13 qof ee ka dhacay xeebaha Puntland, xilli maraakiib dagaal, diyaarado qumaatiga u kaca iyo diyaaradaha aan duuliyaha lahayn ee Turkiga lagu soo warramayo inay ku hareeraysan yihiin markabka M/V LUTUF oo ay koox burcad-badeed ahi afduubatay.

Wasaaradda Arrimaha Dibadda Türkiye oo BBC Somali wax ka weydiisay duqeymaha ayaa sheegtay inaysan “wax xog ah ka hayn” howlgalka. Jawaabtaas ma ahayn beenin rasmi ah oo dowladda Turkigu ku caddeyneyso in ciidamadeedu aysan fulin weerarrada.

Waxaa jira farqi weyn oo u dhexeeya in dowladdu tiraahdo “weerarka annagu ma fulin” iyo inay sheegto “wax xog ah kama hayno.” Hadalka koowaad waa beenin cad, halka kan labaad uu yahay jawaab aan xaqiijinayn, isla markaana aan meesha ka saarayn suurtagalnimada ku lug lahaanshaha Türkiye.

Ilaa hadda, Ankara ma aysan soo saarin war rasmi ah oo si toos ah u sheegaya in ciidamada Turkigu aysan fulin duqeymaha ka dhacay xeebaha Puntland.

Laba weerar oo lagu dilay ugu yaraan 13 qof

Weerarkii ugu horreeyey ayaa ka dhacay agagaarka Garmaal, kaddib markii doon yar ay ku soo laabatay xeebta iyadoo horay ugu tagtay markabka la afduubtay ee M/V LUTUF. Duqeyntaas waxaa lagu dilay afar qof, halka laba kalena lagu dhaawacay.

Wararkii ugu horreeyey ayaa dadka la dilay ku tilmaamay kuwo xiriir la lahaa burcad-badeedda, balse qoysaskooda iyo dadka deegaanka ayaa sheegay inay ahaayeen kalluumeysato rayid ah. Dowladda Puntland ayaa sidoo kale cambaareysay weerarrada lagu beegsanayo dadka rayidka ah iyo hantida bulshooyinka ku nool xeebaha.

Weerar labaad ayaa 23-kii Agoosto ka dhacay aagga xeebta Jiifle. Wararka hordhaca ah ayaa sheegaya in ugu yaraan sagaal qof lagu dilay markii gantaal lala beegsaday doon yar oo ka baxday dhinaca Dhinowda Dhig.

Duqeynta labaad ayaa dhacday xilli markabka M/V LUTUF loo soo wareejiyey agagaarka Jiifle. Ilaa hadda si madax-bannaan looma xaqiijin cidda ay ahaayeen dadka doonta saarnaa iyo inay xiriir la lahaayeen kooxda haysata markabka iyo in kale.

Cidda fulisay labada weerar weli si rasmi ah looma shaacin. Hase yeeshee, su’aalaha ku saabsan doorka Türkiye ayaa sii xoogeysanaya, maadaama maraakiib iyo diyaarado Turkish ah lagu arkay meelaha ku dhow markabka la afduubtay.

Markab u rarnaa saldhigga Turkiga ee Muqdisho

M/V LUTUF, oo ka diiwaangashan Cameroon, ayaa 17-kii Agoosto lagu afduubtay meel qiyaastii 3.5 mayl-badeed u jirta xeebta Marraya ee degmada Eyl.

Markabka ayaa siday hub, qalabka isgaarsiinta iyo qalab dayax-gacmeed oo ku wajahnaa saldhigga tababarka ciidamada Turkiga ee TURKSOM, magaalada Muqdisho, sida uu qoray wakaaladda wararka Associated Press oo soo xigatay sarkaal Soomaali ah.

Toban shaqaale ah ayaa saarnaa markabka, kuwaas oo kala ahaa lix Hindi ah, hal Turkish ah, hal Georgian ah iyo laba ilaalo Serbian ah.

Kaddib afduubka, laba markab oo Turkish ah ayaa u soo dhowaaday M/V LUTUF, halka diyaaradaha qumaatiga u kaca iyo kuwa aan duuliyaha lahayn ee Turkigu ay dusha kala socdeen dhaqdhaqaaqa markabka iyo aagga xeebta.

Joogitaanka ciidamada iyo maraakiibta Turkiga, xamuulka u socday saldhigga TURKSOM iyo duqeymaha is xigay ayaa keenay in indhaha lagu jeediyo Ankara. Hase yeeshee, jawaabta Türkiye siisay BBC Somali — oo ahayd inaysan xog ka hayn howlgalka — ma caddaynayso cidda fulisay weerarrada, mana noqonayso beenin rasmi ah.

Dowladda Puntland ayaa dalalka ku lugta leh howlgallada caalamiga ah ee la-dagaallanka burcad-badeedda ka dalbatay inay sharaxaad ka bixiyaan duqeymaha ka dhacay xeebaheeda, iyadoo ka digtay in weerarrada lagu waxyeelleeyo dadka rayidka ahi dhaawici karaan iskaashiga amni ee ka dhanka ah burcad-badeednimada.

GAROWE ONLINE