Wasiirada arrimaha dibada Sacuudi Carabiya iyo Iiraan oo kulmay
-
WARIYAHA CAALAMKA GAROWE ONLINE
- Posted On 06-04-2023, 06:25AM
BEJING, China - Wasiirrada arrimaha dibadda ee Iran iyo Sacuudi Carabiya - oo ah laba dal taariikh ahaan isku haya bariga dhexe - ayaa wada hadal yeeshay markii ugu horreysay tan iyo 2016-kii.
TV-ga al-Ekhbariya ee Sucuudiga laga leeyahay ayaa sii daayay muuqaal kooban oo muujinaya Amiir Faysal bin Farhan al Saud iyo Hossein Amir-Abdollahian oo isku salaamaya dalka Shiinaha.
Bishii hore, labada waddan waxay ku heshiiyeen inay dib u soo celiyaan xiriirkooda diblomaasiyadeed intii lagu jiray wadahadallo heer hoose ah oo sidoo kale ka dhacay Shiinaha.
Sacuudi Carabiya ayaa xiriirka u jartay Iiraan 2016-kii markii dad badan ay weerareen safaaradda uu ku leeyahay Tehran. Arrintan ayaa daba socotay dil ay Riyadh ku fulisay wadaad Shiico ah oo caan ahaa.
Xiisada u dhaxaysa Sucuudiga oo ay Sunniga u badan yihiin iyo Iran oo Shiicadu hogaamiso ayaa inta badan ahayd mid aad u kacsan. Sacuudi Carabiya ayaa sidoo kale Iran ku eedeysay in ay gacan ka geysatay weerarka Xuutiyiinta.
Isku dayo hore oo dib u heshiisiineed ayaa lagu guul dareystay, balse bishii hore ayay labada dal sheegeen in ay dib u furan doonaan safaaradaha muddo labo bilood gudahood ah. Waxa ay sidoo kale sheegeen in dib loo dhisi doono xiriirkii ganacsiga iyo amniga.
Mareykanka ayaa si taxadar leh u soo dhaweeyay ku dhawaaqistaas, halka Xoghayaha Guud ee Qaramada Midoobay António Guterres uu uga mahadceliyay Shiinaha sida ay u dhexdhexaadiyeen heshiiska.
GAROWE ONLINE
