Xuutiyiinta oo ku hanjabay inay “go’doomin” ku soo rogi doonaan Sacuudiga 

SANCAA, Yemen — Kooxda Xuutiyiinta ee taageerada ka hesha Iiraan ayaa ku hanjabtay inay “go’doomin” ku soo rogi doonto Sacuudiga, kadib markii ay ku eedeysay Riyadh inuu ka dambeeyay weerar lagu qaaday Garoonka Caalamiga ah ee Sancaa, kaas oo sababay burbur iyo hakad ku yimid duulimaadyadii.

Afhayeenka militariga Xuutiyiinta, Yaxya Sariic, ayaa sheegay in kooxdu ay ballaarin doonto weerarrada ay ku hayso Sacuudiga haddii uu sii socdo waxa ay ku tilmaameen gardarrada ka dhanka ah Yemen. Wuxuu sheegay in garoomada diyaaradaha, dekedaha iyo kaabeyaasha kale ee muhiimka ah ee Sacuudiga ay noqon doonaan bartilmaameedyo milatari.

Sariic ayaa sidoo kale ugu baaqay shirkadaha diyaaradaha ee caalamiga ah inay joojiyaan duulimaadyada ay ku tagaan garoomada Sacuudiga, isagoo sheegay in aan la dammaanad qaadi karin ammaankooda haddii ay sii wadaan hawlgallada.

Hanjabaaddan ayaa timid kadib markii Xuutiyiintu ay weerar isugu jiray gantaallo iyo diyaarado aan duuliye lahayn (drones) ku qaadeen Garoonka Caalamiga ah ee Abha ee koonfurta Sacuudiga. Weerarka ayaa calaamad u ah dib u soo laabashada iska horimaadyada tooska ah ee u dhexeeya labada dhinac, kadib muddo ay colaadda xadka ka jirtay ay yara degganeyd.

Weerarkii lagu qaaday Garoonka Caalamiga ah ee Sancaa ayaa yimid xilli xiisadda gobolka ay sii kordhayso. Xuutiyiintu waxay ku eedeeyeen Sacuudiga inuu taageeray ama fuliyay weerarka, inkastoo Riyadh aysan si degdeg ah uga hadlin eedeynta.

Tan iyo dabayaaqadii 2023, Xuutiyiintu waxay si joogto ah u weerarayeen maraakiibta ganacsiga iyo kuwa militari ee maraya Badda Cas iyo Gacanka Cadmeed, iyagoo sheegay inay taageerayaan Falastiiniyiinta ku sugan Marinka Gaza. Weerarradaas ayaa horseeday in Mareykanka iyo xulafadiisu ay duqeymo isdaba joog ah ku qaadaan saldhigyada Xuutiyiinta ee Yemen.

Inkasta oo ay jireen dadaallo diblomaasiyadeed oo lagu doonayay in lagu soo afjaro colaadda Yemen, hanjabaadda cusub ee Xuutiyiinta ayaa muujinaysa khatarta sii kordheysa ee ku wajahan amniga gobolka iyo isu socodka hawada ee Bariga Dhexe.

GAROWE ONLINE