Deni oo guddoomiye KMG ah u magacaabay hay'adda PHA
-
WARIYAHA GAROWE GAROWE ONLINE
- Posted On 29-09-2021, 10:42AM
MUQDISHO, Soomaaliya - Madaxweyne Deni ayaa soo saaray Xeer Madaxweyne Lr.28 September 29, 2021 kuna saabsan xil kaqaadis Guddoomiyaha Hay’adda Waddooyinka Dowladda Puntland.
Cabdulqaadir Cali Xirsi ayaa, sida laga soo xigtey wareegtadan lagu faafiyey ciwaanka Facebook-ga ee Madaxtooyada, waxaa laga qaaday xilka Guddoomiyaha Hay’adda Waddooyinka Dowladda Puntland.
Jagadan waxaa si ku meel gaar ah loogu magacaabay in uu shaqada Hay’adda u sii wadaya, C/risaaq Maxamed Xayir, Guddoomiye ku xigeenka Hay’adda Waddooyinka, sida laga soo xigtay digreetadda.
Hoos ka akhriso wareegtadda
Madaxweynaha Dowladda Puntland Mudane Siciid Cabdullaahi Deni, ayaa soo saaray Xeer Madaxweyne Lr.28 September 29, 2021 kuna saabsan xil kaqaadis Guddoomiyaha Hay’adda Waddooyinka Dowladda Puntland.
Madaxweynaha Dowladda Puntland
Markuu arkay: Dastuurka Dowladda Puntland Qodobkiisa 80-aad.
Markuu arkay: Baahida loo qabo horumarinta Hay’adda Waddooyinka Dowladda Puntland.
Markuu garawsaday: Shaqooyinka baaxadda leh ee horyaala Hay’adda Waddooyinka Dowladda Puntland.
Wuxuu xeeriyey:
1. Waxaa Cabdulqaadir Cali Xirsi laga qaaday xilka Guddoomiyaha Hay’adda Waddooyinka Dowladda Puntland.
2. Waxaa si ku meel gaar shaqada Hay’adda u sii wadaya Guddoomiye ku xigeenka Hay’adda Waddooyinka.
*Xeerkani wuxuu dhaqan gelayaa markuu Madaxweynuhu saxiixo.
Xirsi oo sababsadey dhaleeceyn uu dhowaan warbaahinta u mariyey hay'adaha dowladda gaar ahaan waaxda maaliyada ayaa intii uu xilka hayey waxaa lagu eedeyay in uu horseeday is-qabqabsi iyo khilaaf.
GAROWE ONLINE
