Imaaraadka oo balaarinaya garoonka diyaaradaha Boosaaso
-
WARIYAHA MUQDISHO GAROWE ONLINE
- Posted On 24-09-2019, 04:34PM
BOOSAASO, Puntland – Dowladda Imaaraadka Carabta ayaa si rasmi ah ugu dhawaaqday in ay balaarineyso garoonka diyaaradaha caalamiga ah ee Boosaaso, xarunta ganacsiga Puntland.
Wafdi balaaran oo ka socda xukuumadda Abu Dubai ayaa Talaadada maanta ah waxay tageen xarunta gobolka Bari, halkaasi oo si diiran loogu soo dhaweeyay.
Wasiirka Duulista Hawada iyo Garoomadda Puntland iyo wafdiga oo war-fidiyeenka la hadlay ayaa shaaca ka qaaday in mashruucan uu ku bilaaban doono sida ugu dhow uguna macquulsan.
"Waxaan u diyaarin doonaa in uu noqdo garoomada ugu fiican, ugu adeega iyo shaqadda fiican Geeska [qaaradda] Afrika," ayuu hadalkiisa ku daray wasiir Xusseen Cismaan Lugatoor [Gabilay].
Sheekh Xasan Saciid, oo kamid ah wafdiga ka socda Imaaraadka Carabta, ayaa farxad weyn waxa uu ka muujiyey mashruucan ay fulinayaan.
Hase ahaatee, dhinacyadda ayaa waxa aysan u soo bandhigin saxaafadda waqtiga la bilaabayo dhismaha garoonka iyo cadadka lacagta ku baxeysa balaarintiisa.
Talaabadan ayaa imaaneysa iyada oo lagu wado in Boosaaso ay martigeliso 1-da bisha Janaayo 2020-ka Carwo lagu soo bandhigayo fursadaha maalgeshi iyo ganacsiga wadaniga ah.
GAROWE ONLINE
