GAROWE, Puntland - Ku-simaha Madaxweynaha Dowladda Puntland Ahna Madaxweyne Ku-xigeenka, Axmed Cilmi Cismaan Karaash ayaa maanta shir-guddoomiyay Shir ku saabsan abaaraha.

Ujeedka shirka ayaa ahaa ka jawaabida xaaladda abaaraha Puntland ka jira. Shirka waxaa kasoo qeyb-galay dhammaan Masuuliyiinta iyo Wakiilada Hay'addaha caalamiga ah ee fadhigoodu yahay Puntland.

Sida ay sheegtay madaxtooyadda dowladda Puntland, dhinacyadda ayaa la iska xogwareystay xaaladadaha abaaraha ee guud ahaan saaameyey dhamaan Gobollada Puntland.

Madaxweyne Ku-xigeenka Puntland ayaa la wadaagay Shirka in Dowladda Puntland ay ka go’antahay ayna  dadaal ku bixinayso ka jawaabista Xaaladaha bani’aadanimo ee ka dhasha Abaaraha iyo garab istaaga Shacabka.

"Wuxuuna faray dhammaan Hay’adaha Dowladda in arrintaasi lagala shaqeeyo Guddiga Abaaraha u xilsaaran iyo Hay’addaha la shaqeynaya," ayaa lagu yiri war-saxaafadeedka Madaxtooyadda.

Kulanka waxaa ka qeybgalay Guddiga Abaaraha ee Puntland, Masuuliyiinta Hay’adda Hadma, Maareeyaha Wakaaladda Biyaha, Agaasimaha Guud ee Madaxtooyada iyo masuuliyiin kale.

GAROWE ONLINE