Lacagta ku baxeysa dib-u-dhiska wadada isku xirta Garowe-Boosaaso
-
WARIYAHA GAROWE GAROWE ONLINE
- Posted On 25-09-2019, 04:26PM
BOOSAASO, Puntland – Dowladda Imaaraadka Carabta ayaa ku dhawaaqday in ay maalgelineyso mashruuca dib u dhiska wadada isku xirta Boosaaso-Garoowe.
Madaxtooyadda dowladda Puntland ayaa Arbacada maanta ah waxay ku dhawaaqday in howsha dayactirka ay bilaabaneyso bisha soo aadan ee October.
Xafiiska madaxweyne Saciid Cabdullaahi Deni ayaa shaaciyey in xukuumadda Abu Dubai ay mashruucaas ku bixin doonto aduun lacageed dhan 2-milyan oo Doollar.
"…Dowladda China ayaa iyana ka qeyb qaadanaysa howsha dib u dhiska," ayuu yiri sarkaal sarre oo ka tirsan Madaxtooyadda oo u waramay Garowe Online.
Talaadadii, 24-ka September 2019-ka, ayay ahayd markii Imaaraadka la wareegay howlaha balaarinta garoonka diyaaraddaha magaala xeebeedka Boosaaso.
Mashruucaasi oo aanan la shaacin lacagta ku baxeysa iyo goorta la bilaabayo ayaa waxaa uu qeyb ka yahay barnaamijyadda horumarinta kaabeyaasha dhaqaalaha.
Imaaraadka ayaa haatan wuxuu maamulaa dekadda ku taala xarunta ganacsiga Puntland, taasi oo kamid ah kuwa ugu shaqooyinka fiican Soomaaliya.
GAROWE ONLINE
