Madaxweyne Deni oo kala diray Golahii Degaanka Buurtinle
-
WARIYAHA GAROWE
- Posted On 19-06-2019, 02:45PM
GAROWE, Puntland - Sidda ku cad wareegto kasoo baxday Madaxtooyadda, madaxweyne Deni ayaa maanta oo Arbaco ah wuxuu kala diray Golaha Degaanka degmadda Buurtinle ee gobolka Nugaal.
Digreetadda oo ku taariikheysan 19-ka June 2019 ayaa lagu shaaciyey in madaxweynaha dowladda Puntland uu talaabadan uu qaadey kadib talo soo jeedin uga timid Wasaarada Arrimaha Gudaha.
Kala dirida Golaha Degaanka Buurtinle ayaa imaaneysa maalin kadib markii xubnaha Golahaasi ay shaaciyeen in ay shaqadii ka tageen, wallow aysan shaacin sababta dhabta ah.
Talaabada xigta ee la filayo ayaa ah in Wasaaradda Arrimaha Gudaha Puntland ay soo dhisto Gole degaan cusub kaasi oo bulshada qeybaheeda kala duwan ay iska dhex aragto.
HOOS KA AKHRISO WAREEGTADDA
Madaxweynaha Dowladda Puntland Mudane Siciid Cabdullaahi Deni ayaa Xeer Madaxweyne Lr-28 ee Juun, 19, 2019, ku kala dirid Golaha Deegaanka ee Degmada Buurtinle.
Madaxweynaha Dowladda Puntland
Markuu arkay: Dastuurka Dowladda Puntland.
Markuu tixgeliyey: Is casilaaddii Golaha Deegaanka Degmada Burtinle.
Markuu Qiimeeyey: Tala soo jeedinta Wasaaradda Arrimaha Gudaha, Federaalka iyo Dimuqraadiyeynta.
Wuxuu xeeriyey:
1. Waxaa la kala diray Golaha Deegaanka Degmada Buurtinle.
2. Xeerkani wuxuu dhaqangelayaa markuu Madaxweynuhu saxiixo, wuuna saxiixay Madaxweynuhu.
GAROWE ONLINE
